Almaty oblysynda eki qyzyn jyldar boıy zorlap kelgen ákege úkim shyqty

QONAEV. KAZINFORM — Almaty oblysynyń qylmystyq ister jónindegi mamandandyrylǵan aýdanaralyq soty birneshe jyl boıy eki qyzyna zorlyq jasap kelgen er adamǵa úkim shyǵardy.

Sotta anyqtalǵandaı, sottalýshy Ts. 2010 jyldan 2023 jylǵa deıin kámeletke tolmaǵan qyzdaryna nápsiqumarlyq sıpatta kúsh qoldaný arqyly zorlyq-zombylyq jasap qorlaǵan. 

Qylmystyń jaı-japsaryn zańmen jarııa etý múmkin bolmaǵandyqtan is jabyq sot otyrysynda qaraldy.

Prokýror kúdiktini Qylmystyq kodekstiń 121-babynyń 4-bóligi, 124-baby, 120-babynyń 3-1-bóligi, 2-tarmaǵymen kináli dep tanyp, 25 jylǵa bas bostandyǵynan aıyrýdy surady. 

Er adam sońyna deıin óz kinásin moıyndamady.

Biraq onyń kinási kýágerlerdiń aıǵaqtarymen, saraptama qorytyndysymen dáleldendi.

«Sot úkimimen azamat Ts. joǵaryda atalǵan qylmysty jasaǵany úshin kináli dep tanylyp, 25 jylǵa bas bostandyǵynan aıyryldy», — dep habarlady Almaty oblysy sotynan.

Sot úkimi zańdy kúshine engen joq.

Eske sala keteıik, bul oqıǵa byltyr áshkere bolǵan edi. Apaly-sińlili eki qyzǵa týǵan ákesi jyldar boıy azǵyndyq jasap kelgen.

11-12 jasynan zorlyqqa ushyraǵan olar bir-biriniń basyndaǵy jaǵdaı týraly bilmegen. Qyzdardyń biri úıinen qashyp ketpeıinshe analary da bul sumdyqtan beıhabar bolǵan.

Byltyr jazda Almaty qalalyq polıtsııa departamenti is qozǵady.