Almaty oblysynda eki qyzdy kólik qaǵyp, mert qyldy

QONAEV. KAZINFORM — Almaty oblysy Esik qalasynda 14 jáne 3 jastaǵy eki qyzdy kólik qaǵyp, mert qyldy.

Áleýmettik jelide jol apaty ornynan túsirilgen vıdeo paıda boldy. Qaıǵyly oqıǵa 8 maýsym kúni saǵat 21:10–da saıajaı aýmaǵynda boldy, delingen jazbada. 

Almaty oblysynyń polıtsııa departamentiniń málimetinshe, 8 maýsym kúni Esik qalasyndaǵy Altyn Adam alleıasy kóshesimen kele jatqan Mercedes Benz markaly kóliginiń júrgizýshisi kámeletke tolmaǵan eki qyzdy qaǵyp ketti.

«Saldarynan kámeletke tolmaǵan eki qyz bala da sol jerde kóz jumdy. Kólik júrgizýshisi ýaqytsha ustaý ızolıatoryna qamaldy. Oqıǵaǵa qatysty qylmystyq is qozǵalyp, qajetti saraptamalar taǵaıyndaldy», — dep túsindirdi oblystyq polıtsııa departamentiniń baspasóz qyzmeti.