Almaty oblysynda eki balasy men áıeldi óltirgen adam ómir boıyna sottaldy
ALMATY. KAZINFORM - Almaty oblysynyń qylmystyq ister jónindegi mamandandyrylǵan aýdanaralyq sotynda áıel jáne onyń eki balasyn óltirip, qylmysty jasyrý úshin úıdi órtep jibergen qylmystyq iske baılanysty ustalǵan kúdiktige sot sheshimi shyqty.
«Sottalýshy mas kúıinde pyshaq qoldanyp, birge turatyn seriktesi men onyń kámeletke tolmaǵan eki balasyn óltirgen. Sodan keıin úıdiń esigin syrtynan qulyptap, qashyp ketken. Bir kúnnen keıin ol qylmys ornyna qaıta kelip, jábirlenýshiniń 40 myń teńgesin urlap, kisi óltirý izin jasyrý úshin olardyń úıin órtep jibergen. Sottalýshynyń kinási is materıaldarymen: kýálardyń aıǵaqtarymen, sarapshylardyń qorytyndylarymen jáne sotta rastalǵan jáne zerttelgen basqa da dáleldemelermen tolyq dáleldengen», - dep habarlady QR Joǵary sotynan.
Sot sheshimi boıynsha qandy qylmysker ózine taǵylǵan is-áreketterdi jasaǵany úshin kináli dep tanylyp, oǵan ómir boıyna bas bostandyǵynan aıyrý jazasy taǵaıyndaldy. Sottyń úkimi zańdy kúshine engen joq.
Aıta keteıik, buǵan deıin atalǵan is boıynsha 41 jastaǵy Almaty turǵyny ustalǵanyn jazǵan edik.
Eske salaıyq, byltyr 14 qyrkúıekte Іle aýdanyna qarasty Aşybulaq aýylynda órtengen úıden zorlyq-zombylyq belgileri bar áıel men eki kishkentaı balanyń máıiti tabylǵan bolatyn. Keıin áıeldiń azamattyq nekedegi kúıeýi kúdikti retinde ustaldy.
