Almaty oblysynda eki áıel jasóspirim qyzdy qorlady degen kúdikke ilindi

QONAEV. KAZINFORM — Almaty oblysynda eki áıeldiń kámeletke tolmaǵan balany urlap ketkeni týraly aqparat tarady.

Jelide taraǵan aqparatta kúdiktiniń biri aýyldyq aýyl okrýgi ákimi apparatynyń qyzmetkeri ekeni aıtylady. Eki áıel 16 jastaǵy qyzdy úıinen urlap ketken.

— Áıelder qyzdy uryp-soǵyp, temekimen kúıdirip, ózenge batyryp, zorlyq-zombylyq kórsetip, qol-aıaǵyn súıýge májbúrlegen jáne osynyń bárin vıdeoǵa túsirgen. Sondaı-aq olar bul vıdeony taratpaý úshin úsh mıllıon teńge talap etken, — delingen aqparatta.

Almaty oblysynyń Polıtsııa departamenti Kazinform tilshisine bul oqıǵany rastap, túsinik berdi. Vedomstvonyń málimetinshe, kúdiktiler ustalyp, qylmystyq is qozǵaldy.

— Kámeletke tolmaǵanǵa dene jaraqatyn salý jáne jynystyq sıpattaǵy zorlyq-zombylyq áreketterin jasaý faktisi boıynsha qylmystyq is qozǵaldy. Eki kúdikti áıel quryqtalyp, ýaqytsha ustaý ızolıatoryna qamaldy. Qazirgi ýaqytta bolǵan oqıǵanyń barlyq mán-jaıyn anyqtaýǵa baǵyttalǵan tergeý júrgizilip jatyr, — dep habarlady polıtsııa.

Polıtsııa kináliler qoldanystaǵy zańnamaǵa sáıkes qatań jaýapkershilikke tartylatynyn atap ótti.

Sonymen qatar qylmystyq protseske qatysýshylardyń jeke derekteri jarııa boldy degen málimetter tekserilip jatyr.

Eske salaıyq, buǵan deıin Qaraǵandy oblysy Shet aýdany Aqshataý aýylynyń ákimi boıjetkendi zorlady degen kúdikke ilingen edi.