Almaty oblysynda dropperlik úshin alǵashqy is qozǵaldy

QONAEV. KAZINFORM — Almaty oblysynda dropperlik áreketke qatysty alǵashqy qylmystyq is qozǵaldy. 

Oblys prokýratýrasynyń málimetinshe, jańa engizilgen 232-1-bap boıynsha sotqa deıingi tergeý Eńbekshiqazaq aýdanynyń turǵynyna qatysty bastalǵan.

Tergeý deregi boıynsha áıel OLX platformasynda jarııalanǵan «onlaın-tólemder operatory» týraly jalǵan habarlandyrýǵa aldanyp, óziniń bank kartasyn alaıaqtardyń paıdalanýyna bergen.

— Qyrkúıekten bastap onyń shotyna 2 mıllıon teńgeden astam qarajat túsken. Onyń 5 paıyzyn áıel «komıssııa» retinde alyp otyrǵan. Qalǵan qarajatty alaıaqtardyń esepshotyna aýdarǵan, — dep habarlady vedomstvo.

Prokýratýra muny alaıaqtardyń keń taraǵan ádisi ekenin eskertti. Qylmyskerler urlanǵan qarajatty ótkizý úshin óz rekvızıtin paıdalanýǵa daıyn adamdardy ádeıi izdeıdi. Endi zańǵa engizilgen ózgeristerge sáıkes, mundaı dropperler de, olardyń áreketin uıymdastyrýshylar da qatań jaýapkershilikke tartylady. Bul zań 2025 jylǵy 16 qyrkúıekten bastap kúshine endi. Endi mundaı áreket úshin 7 jylǵa deıin bas bostandyǵynan aıyrý jazasy qarastyrylǵan.

Qazir Eńbekshiqazaq aýdandyq polıtsııa basqarmasy qajetti tergeý sharalaryn júrgizip jatyr.

Vedomstvo turǵyndarǵa bank kartalaryn, PIN-kodtaryn jáne onlaın bank qupııasózin ózge adamǵa bermeý keregin eskertti.

Eske salaıyq, «dropperlik» týraly zań kúshine engen ýaqyttan bastap elde atalǵan bap boıynsha 7 qylmystyq is tirkelgenin jazǵanbyz.

Sondaı-aq polıtsııa dropper bolýdyń saldary qandaı bolatynyn túsindirgen edi.