Almaty oblysynda dron-shoýǵa 15 myń adam jınaldy
QONAEV. KAZINFORM — Almaty oblysynda Respýblıka kúnine oraı dron-shoý uıymdastyryldy.
Almaty oblysy ákimdiginiń málimetinshe, Qonaev qalasynda Respýblıka kúnine oraı alǵash ret aýqymdy dron-shoý ótti. Ortalyq alańǵa jınalǵan 15 myńǵa jýyq adam aspandy jaryq pen áýenge toltyrǵan erekshe kórinisti tamashalady.
Kókke kóterilgen 550 dron el tarıhyn, birligin jáne rýhyn aıshyqtaǵan áserli kórinisterdi usyndy. Shoýdyń eń sharyqtaý shegi — drondar arqyly Ánuranynyń sózderi aspanda jarqyrap jazylýy boldy.
Dron-shoý barysynda aspanda elimizdiń basty rámizderi men beıneleri paıda boldy: Qazaqstan kartasy, memlekettik tý, dombyra men nota, «Altyn adam», barys, alma jáne «25 qazan — Respýblıka kúni» degen jazý. Sondaı-aq «Zań men tártip — Zakon ı porıadok» degen kompozıtsııa men «Qonaev qalasy» degen jazýdy beıneledi.
Merekelik kesh kontsertpen jalǵasty. Sahnada Hansultan, Móldir Áýelbekova, Qýandyq Rahym, Asylbek Ensepov, Esko, Ray, Nursultan Nurberdıev, Il Canto kvarteti jáne tanymal ártister óner kórsetti.
Eske salaıyq, buǵan deıin Almaty oblysynda alǵash ret aýqymdy dron-shoý ótetinin jazǵanbyz.