Almaty oblysynda donor birneshe adamnyń ómirin qutqaryp qaldy

ASTANA. KAZINFORM — Almaty oblysynyń kópbeıindi klınıkalyq aýrýhanasynda kóp aǵzalyq donorlyq protsess júrgizildi, dep habarlaıdy Densaýlyq saqtaý mınıstrliginiń baspasóz qyzmeti.

Dárigerlik konsılıýmnyń qorytyndysy boıynsha 1979 jyly týǵan patsıentte mıdyń ólimi anyqtaldy. Túsindirme áńgimeden keıin týystary qaıtys bolǵannan keıingi donorlyqqa kelisim berý týraly sheshim qabyldady.

Protsestiń barlyq kezeńin Transplantattaýdy jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyq uıymdastyrdy.

— Donorlyq protsess barysynda eki búırek, júrek, baýyr jáne móldir qabyq alyndy. Barlyq donorlyq aǵza beıindi medıtsınalyq uıymdarǵa jedel jetkizildi. Júrek, baýyr, búırek jáne móldir qabyqty transplantattaý sátti aıaqtaldy. Medıtsınalyq kómek patsıentterge, onyń ishinde respýblıkalyq kútý paraǵynda turǵan balaǵa kórsetildi. Densaýlyq saqtaý mınıstrligi týystaryna kórsetken batyldyǵy men basqa adamdardyń ómirin saqtap qalýǵa qosqan úlesi úshin shyn júrekten alǵys bildiredi, — delingen mınıstrlik habarlamasynda.

2025 jyldyń sońyndaǵy jaǵdaı boıynsha Qazaqstanda transplantattaýdy kútý paraǵynda 4 506 patsıent, onyń ishinde 123 bala bar. Basym kópshiligi — 90%-dan astamy — búırekti transplantattaýdy qajet etedi. 

Budan buryn Mańǵystaýda alǵash ret máıittik donor tirkelgenin jazǵanbyz.