Almaty oblysynda demalys kúnderi 42 gektar qurǵaq shóp órtengen

ALMATY. KAZINFORM — Almaty oblysynda demalys kúnderi ystyq aýa raıyna baılanysty qurǵaq shóp órtenýi faktileri jıi boldy.

Almaty oblysynyń TJD málimetinshe, senbi-jeksenbi kúnderi óńirdiń órt sóndirý qyzmetteri 80-nen astam qyzmettik shaqyrtýǵa shyqqan. Olardyń qatarynda — órt oqıǵalary, qurǵaq shóptiń janýy jáne izdestirý-qutqarý jumystary bar.

— Taýly aýmaqtardy qosa alǵanda, janǵan qurǵaq shóptiń jalpy aýmaǵy 42 gektardy qurady. Azamattardan «112» nómirine — 1200 qońyraý, «101» nómirine — 588 shaqyrtý kelip tústi, — dep habarlady TJD.

Eske salaıyq, Almatyda 5-sanattaǵy órt qaýiptiligi jarııalandy.

Buǵan deıin Almaty mańyndaǵy taýly aımaqta qurǵaq shóp órtengenin jazǵanbyz.

Sondaı-aq Almatyda Keńsaı-1 aýmaǵyndaǵy taý bókterinde órt shyqty.