Almaty oblysynda dárigerler eki balanyń ishinen 32 magnıt alyp shyqty
QONAEV. KAZINFORM — Almaty oblystyq balalar klınıkalyq aýrýhanasynda magnıt jutyp qoıǵan 7 jáne 4 jasar eki aǵaıyndyǵa sátti ota jasaldy.
Balalar mazasyzdanyp, ishteri aýyrǵandyqtan, aýrýhanaǵa jetkizilgen. Tekserý kezinde olardyń asqazan-ishek joldarynan birneshe magnıt anyqtalǵan.
Dárigerler tez arada ota jasaýǵa sheshim qabyldady. Bógde zat 4 jasar búldirshinniń asqazany men ash isheginiń ártúrli bóligine túsip ketken eken. Magnıtter bir-birinen alshaq jatsa da, bir-birine tartylyp, ishekti qysyp turǵan. Bilikti mamandar balanyń asqazanynan 15 magnıt alyp shyqty. Qalǵan 14 magnıt ash ishekten tabylǵan.
Sonymen qatar dárigerler ota kezinde balanyń isheginde týabitti kishkentaı qalta tárizdi ósindini, ıaǵnı «Mekkel dıvertıkýlyn» da alyp tastady. Osylaısha, búldirshinniń aǵzasynan barlyǵy 29 magnıt shyǵaryldy.
Al úlken balanyń toq isheginen bir-birine jabysyp qalǵan úsh magnıt tabyldy. Dárigerler laparoskopııalyq ota jasap, arnaıy hırýrgııalyq ádispen magnıtterdi soqyr ishek tusyna jyljytyp, sol jerden alyp shyqty. Bul tásildiń negizgi artyqshylyǵy — ishekti tikeleı kesip ashpaı-aq, bógde zattardy alyp shyǵýǵa múmkindik beredi.
Oblystyq balalar klınıkalyq aýrýhanasynyń hırýrgi Asqar Qanazovtyń aıtýynsha, balalar magnıtterdi úıde oınap júrip abaısyzda jutyp qoıǵan. Ata-anasy der kezinde jedel járdem shaqyryp, medıtsınalyq kómekke júgingen.
— Birneshe magnıtti jutyp qoıý balanyń densaýlyǵyna úlken qaýip tóndiredi. Sebebi magnıtter ishektiń ártúrli bólikterinde ornalassa da, bir-birine tartylyp, ishekti qysyp qalýy múmkin. Sonyń saldarynan qan aınalymy buzylyp, ishek zaqymdanýy, tipti tesilip ketýi yqtımal. Mundaı jaǵdaıda ýaqyt joǵaltý aýyr zardaptarǵa ákelýi múmkin. Sondyqtan medıtsınalyq kómekke der kezinde júginý óte mańyzdy. Bul balalar magnıtterdi jutqannan keıin shamamen 5 saǵat ótken soń aýrýhanaǵa tústi. Olardyń ýaqytyly jetkizilýi men medıtsına mamandarynyń úılesimdi jumysynyń arqasynda qaýiptiń aldyn aldyq, — dedi hırýrg.
Otadan keıin aǵaly-inili tolyq tekserýden ótti. Olardyń aǵzasynan qosymsha magnıtter anyqtalǵan joq. Dárigerlerdiń jedel sheshimi men kásibı jumysynyń arqasynda balalar jazylyp, 9 kúnnen keıin úılerine shyǵaryldy.
Dárigerler ata-analardy balalardyń qaýipsizdigine erekshe mán berýge shaqyrady.
— Magnıtti konstrýktorlar, usaq oıynshyqtar men magnıt bólshekteri, ásirese, kishkentaı balalar úshin qaýipti. Magnıt jutqan balada bastapqyda eshqandaı belgi baıqalmaýy múmkin. Ol ózin jaqsy sezinip, ádettegideı oınap júrýi de yqtımal. Alaıda ýaqyt óte kele asqynýlar damyp, ishi aýyryp, kebýi, júregi aınýy, qusýy, tábeti tómendeýi múmkin. Sondaı-aq bala mazasyzdanyp, jıi jylaýy, dene qyzýy kóterilip, úlken dáreti buzylýy yqtımal, — dep eskertti mamandar.
Dárigerlerdiń eskertýinshe, bala magnıt jutyp qoıǵanyna kúdik bolsa, eshqandaı belgi baıqalmasa da, úıde baqylap ýaqyt joǵaltpaı, dereý medıtsınalyq kómekke júginý qajet.
Eske salaıyq, Almatyda 8 jastaǵy balanyń mıyna kúrdeli ota jasalǵan edi.
