Almaty oblysynda dándi jáne maıly daqyldardy óńdeıtin agrokeshen iske qosyldy
ALMATY. KAZINFORM - Almaty oblysynda «Qapshaǵaı Bıdaı Ónimderi» atty dándi jáne maıly daqyldardy tereń óńdeýge mamandanǵan jańa agrokokeshen paıdalanýǵa berildi. Bul týraly Aýyl sharýashylyǵy mınıstrliginiń baspasóz qyzmeti habarlady.
Atalǵan is-sharanyń saltanatty ashylý rásimi 1 qarasha kúni Qonaev qalasynda ótti. Oǵan aýyl sharýashylyǵy vıtse-mınıstri Azat Sultanov, oblys ákimi Marat Sultanǵazıev, sondaı-aq bıznes ókilderi men Qytaıdan kelgen seriktester qatysty.
Jańa zaýyt óńirdiń agrarlyq sektoryndaǵy iri ınvestıtsııalyq jobalardyń biri bolyp tabylady. Kásiporynnyń qýattylyǵy jyl saıyn 1 mıllıon tonnadan astam daıyn ónim óndirýge múmkindik beredi. Jalpy ınvestıtsııa kólemi 15 mıllıard teńgeden asty. Bul — Qaskeleń qalasynan keıingi Almaty oblysyndaǵy ekinshi osyndaı óndiris orny.
Oblys ákimi Marat Sultanǵazıev jańa agroónerkásiptik keshenniń iske qosylýy aýyl sharýashylyǵy ónimderin óńdeý salasynyń damýyna serpin beretinine toqtaldy:
– Almaty oblysy – elimizdiń eń qarqyndy damyp kele jatqan aımaqtarynyń biri. Geografııalyq turǵydan tıimdi ornalasýy, ınfraqurylymnyń damýy jáne ınvestorlarǵa jasalǵan qoldaý agroónerkásip kesheniniń turaqty ósimin qamtamasyz etip otyr. Biz qosylǵan quny joǵary ónim shyǵaratyn jáne aýyl sharýashylyǵy ónimderin óńdeýdi damytatyn jobalardy ári qaraı da qoldaı beremiz. «Qapshaǵaı bıdaı ónimderi» ınnovatsııalyq ári eksportqa baǵyttalǵan óndiristiń úlgisine aınalady, - dedi óńir basshysy.
Óz kezeginde aýyl sharýashylyǵy vıtse-mınıstri Azat Sultanov bul jobanyń el Prezıdenti qoıǵan naqty tapsyrmamen ushtasatynyn atap ótti:
– Aýyl sharýashylyǵy ónimderin tereń óńdeý – Memleket basshysynyń tapsyrmasy ári salanyń basym baǵyty. «Qapshaǵaı Bıdaı Ónimderi” zaýytynyń iske qosylýy bıznes pen memlekettiń ortaq maqsatqa – aýyl sharýashylyǵyn tıimdi etýge jáne joǵary qosylǵan quny bar ónim óndirýge umtylysyn kórsetedi. Mundaı kásiporyndar jergilikti ekonomıkany nyǵaıtyp, agrosektordyń básekege qabilettiligin arttyrady, - dedi vıtse-mınıstr.
Rásim sońynda qonaqtar zaýyttyń óndiristik qýatymen tanysty. Qyzyl túımeni basý jáne lokomotıv gýdogyn iske qosý arqyly kásiporynnyń jumysy resmı túrde bastaldy.