Almaty oblysynda «Dala dámi» jármeńkesinde halyqqa 365 tonnadan astam ónim usynyldy
QONAEV. KAZINFORM — Almaty oblysynda «Dala dámi» aýyl sharýashylyǵy jármeńkesi ár demalys kúni óńirdiń túkpir-túkpirinde jalǵasyp jatyr. Igi shara barysynda barlyǵy 365 tonnadan astam 31 túrli ónim halyqqa usynyldy. Saýda sórelerine et, sút, bal, balyq ónimderi, túrli jemis-jıdek pen kókónister qoıyldy. Al jármeńkedegi baǵa bazardan 15-20 paıyzǵa tómen. Bul týraly Almaty oblysy ákiminiń baspasóz qyzmeti habarlady.
Turǵyndar sút ónimderi, kúnbaǵys maıy men jumyrtqany kóptep satyp alýda. Kókónister, onyń ishinde kartop, pııaz ben qyzanaqqa jáne áıgili aport almasyna suranys joǵary. Máselen, jármeńke bastalǵaly 45 tonna kartop, 30 tonna pııaz jáne 31 tonna alma, 2 tonna sút pen 95 000 dana jumyrtqa saýdalandy.
El kóleminde uıymdastyrylyp jatqan «Dala dámi» jármeńkesi naryqta otandyq óndirýshilerdiń úlesin arttyrýǵa jol ashady. Óndirýshi men tutynýshy arasynda tikeleı baılanys ornatyp, qos tarapqa da tıimdi jaǵdaı jasaıdy. Shara Almaty oblysynda 19 qyrkúıek kúni bastalyp, ár senbi úzbeı jalǵasyp keledi. Jergilikti sharýalardy qoldaý aýyldaǵy óndiristiń damýyna, jańa jumys oryndarynyń qurylýyna yqpal etedi. Sondaı-aq ónimdi ótkizý naryǵyn keńeıtýge, turǵyndardy sapaly ári qoljetimdi otandyq ónimmen qamtamasyz etip, baǵa turaqtylyǵyn saqtaýǵa múmkindik beredi. Jármeńkelerde negizinen áleýmettik mańyzy bar azyq-túlik satylýda. Sórege qoıylǵan ónimniń barlyǵy sapa standarttaryna tolyǵymen saı keledi.
Aýqymdy jármeńkeniń biri oblys ortalyǵy Qonaev qalasynda ótti. Tań sáriden «Aısha sıtı» bazaryna jınalǵan jurttyń qarasy qalyń boldy. Solardyń biri — qala turǵyny Aqmaral Ásenova.
— Jármeńkedegi baǵa kóńilge qonymdy. Ájeptáýir aqshamdy únemdep, kerekti azyq-túliktiń bárin satyp aldym. Bul — biz úshin aıtarlyqtaı demeý, — dedi ol.
«Dala dámi» jármeńkesi kásipkerler men sharýalar úshin óz ónimin tanystyryp, deldalsyz saýdalaýǵa berilgen jaqsy múmkindik ekeni anyq.
— Jármeńkege ózimizdiń kondıterlik ónimderdi ala keldik. Mundaǵy jurt bálish pen tátti toqashymyzdy kóp suraıdy. Usynyp otyrǵan ónimniń barlyǵy — tabıǵı taza ári «Halal» sertıfıkatyna ıe. Al qoıǵan baǵamyz — qoljetimdi. Kelesi joly budan da kóp ónim túrin jármeńkege ákelýdi josparlap otyrmyz, — deıdi Talǵar aýdanynan kelgen Muhıt esimdi kásipker.
Aıta keteıik, kelesi jármeńke 24 qazan kúni ótedi jáne jyl sońyna deıin jalǵasady.
