Almaty oblysynda buzylǵan bóget: 28 adam evakýatsııalandy
QONAEV. KAZUNFORM – Almaty oblysynda bógettiń buzylý saldarynan zardap shekkender men qaza tapqandar bolǵan joq.
31 naýryz saǵat 13:00-de jaǵdaı turaqtaldy, sý deńgeıi tómendep keledi. Qaraoı aýylyndaǵy «Ýtıankı» kólinen 150 myń tekshe metr sý jiberildi, qazir 5 tekshe metr sý kelip jatyr. Bógetten 6,2 tekshe metr sý jiberildi. Aýyldarǵa sý kirgen joq.
«Túnde qaýipsizdik maqsatynda jaqyn mańdaǵy Baıkent aýylynan 28 adam qaýipsiz jerge kóshirildi. Mektepte olarǵa ystyq tamaq, jatyn oryn jáne basqa da qajetti zattarmen qamtamasyz etildi. 31 naýryz túski saǵat 12.00-de evakýatsııalanǵan adamdar týystaryna ketti. Ákimdik tarapynan oqıǵa ornynda jumys istep jatqan áskerıler men basqa da qyzmetkerlerge ystyq tamaqtar taratyldy. Bógettiń buzylý sebebi tolyq joıylǵansha, ýchaskede táýlik boıy kezekshilik uıymdastyrylady», - dep habarlady Almaty oblysy ákimdiginiń baspasóz qyzmeti.
Almaty oblysy TJD-nyń málimetishe, TJD, PD, JAO qyzmetkerleri jaqyn mańdaǵy aýyldarda aýlalardy aralap, halyqty habardar etti. Aýlany aralaý nátıjesinde úılerdi sý basý jaǵdaılary tirkelgen joq. Qurbandar men zardap shekkender joq. Tótenshe jaǵdaı týyndaǵan jaǵdaıda adamdar Qaraoı aýylyndaǵy № 49 jáne № 18 orta mektepterine evakýatsııalanatyn bolady. Ol jerde 250 oryn daıyndaldy, evakýatsııalaý úshin 2 birlik avtobýs tehnıkasy, 7 vahtovka daıyndaldy.
Jaınaq aýyly – Baıseıit aýyly, Qaraoı aýyly – N.Tilendıev aýyly avtojoly boıyndaǵy oblystyq mańyzy bar kópir ótkelderinde sý deńgeıin monıtorıngileý jáne avtokólik quraldaryn ótkizý úshin JPQ beketteri qoıyldy.
«Tartylǵan kúshter jáne quraldarmen 250 tonna ınertti materıal, 3 000 qapshyqpen jaǵany nyǵaıtý jáne tóseý jumystary júrgizilýde. Injenerlik tehnıkamen bóget sańylaýyn beton konstrýktsııalary, topyraqpen jabý jumystary júrgizilýde. Tótenshe jaǵdaıdy joıýǵa Almaty oblysy TJD, JAO, PD, 28237, 2466 áskerı bólimderi, RJQJ, REQ jáne Gaz qyzmetinen barlyǵy 300-ge jýyq qyzmetker men 70-ke jýyq tehnıka jumyldyryldy», - dep habarlady Almaty oblysy TJD-nyń baspasóz qyzmeti.
Eske salaıyq, keshe Іle aýdany Baıkent aýyldyq okrýgindegi Voroshılov sý qoımasynyń bógeti buzyldy.
Aıta keteıik, 1910 jyly salynǵan (114 jyl) Voroshılov sý qoımasynyń bógeti 2017 jyly 49 jylǵa senimgerlik basqarýǵa berilgelgen bolatyn.
