Almaty oblysynda bútin bir aýyl sýsyz otyr – Májilis depýtaty
QONAEV. KAZINFORM – Almaty qalasyna irgeles ornalasqan Qarasaı aýdanyna qarasty Kemertoǵan aýylynda aýyzsý tapshylyǵy jyldar boıy sheshimin tappaı keledi.
20 myńǵa jýyq turǵyny bar eldi mekende ortalyqtandyrylǵan sý júıesi bar bolǵanymen, tehnıkalyq jaǵdaıy syn kótermeıdi. Qubyrlardaǵy qysym tym álsiz. Keıbir kóshelerge múlde sý jetpeıdi. Turǵyndar tirshilikke qajetti sýdy túngi ýaqytta ydyspen jınap, kúndelikti sharýalaryn soǵan beıimdeýge májbúr.
– Qala irgesinde otyrsaq ta, sýdy shelekpen tasımyz. Kóbimiz qudyqtan ishemiz. Jerden 13–14 metr tereńdikten alynǵan sýdyń sapasy nashar. Tunbasy, ıisi bar. Mundaı sýdy ishý túgili, kir jýýǵa da kelmeıdi. Qubyr tartylǵanymen, qysym joq. Sý tek túnde syzdyqtap aǵady. Qazir aýyldyń tek 20 paıyzy ǵana ortalyqtandyrylǵan sýmen qamtylǵan. Biz Qaskeleń toptyq sý qubyry jobasyna da kirmeımiz. Qazir sýdy «BeyAzhTrans» JShS men «Taýsamaly-Qyzmet» MKK jetkizip otyr. Biraq olardyń uńǵymalary álsiz ári tozǵan. Osy máseleni shyndap kóterý úshin AMANAT partııasynyń Májilis depýtattaryn arnaıy shaqyrttyq. Olar kelip, halyqtyń jaǵdaıyn kórip otyr, - deıdi aýyl turǵyny, ardager Eginbek Egeýbekov.
Máseleni kózben kórip, turǵyndarmen ashyq formatta pikirlesý úshin QR Parlamenti Májilisiniń depýtattary Maksım Rojın men Danııar Qasqaraýov Kemertoǵanǵa arnaıy keldi.
«AMANAT» partııasy fraktsııasynyń múshesi Maksım Rojınniń aıtýynsha, bul másele bir jarym jyl buryn Qaskeleńdegi qoǵamdyq qabyldaýda alǵash ret kóterilgen. Sol joly 20-dan astam túıtkil tirkelip, sonyń kóbi sheshimin tapqan. Al qazir Kemertoǵan úshin eń ózekti másele – taza aýyzsýǵa qol jetkizý.
– Qazir aýylda 4500-den astam úı ortalyq sý júıesine qosylmaǵan. Turǵyndar ártúrli tarıfpen, sapasy kúmán týdyratyn jeke uńǵymalardan sý tutynyp otyr. Qajetti qujattar men jer telimi daıyn. Endi basty maqsat – respýblıkalyq bıýdjetten qarjy tartý. Bul másele Úkimet qaraýyna usynyldy. Premer-Mınıstr tarapynan baqylaýǵa alyndy. Bıýdjet naqtylanǵanda qarjy bólinýi tıis. Bul másele «AMANAT» partııasynyń tikeleı baqylaýynda. Partııanyń «Halyqpen birge» saılaýaldy baǵdarlamasynda ınfraqurylymdy jańǵyrtý negizgi basymdyqtardyń biri retinde belgilengen, - dedi Májilis depýtaty Maksım Rojın.
Onyń sózinshe, jobalyq-smetalyq qujattama aıasynda jalpy uzyndyǵy 184,8 shaqyrym bolatyn sý qubyry, eki rezervýar, úsh nasos stantsııasy, dızel generatory jáne transformatorlyq qosalqy stantsııa salý josparda. Qurylys aıaqtalǵan jaǵdaıda 20 myńǵa jýyq turǵyn sapaly aýyzsýmen qamtylatyn bolady.
Osyǵan deıin Almatynyń taý bókterindegi aýyz sý máselesi qashan sheshiletini týraly jazǵanbyz