Almaty oblysynda bir apta órtengen qoqys polıgony jabylýy múmkin
QONAEV. KAZINFORM — Alataý qalasynyń aýmaǵyndaǵy qoqys polıgony ekologııalyq normalardyń saqtalmaýyna baılanysty jumysyn ýaqytsha toqtatýy múmkin.
Bul týraly Almaty oblysy ekologııa departamentiniń memlekettik ekologııalyq baqylaý bólimi basshysynyń mindetin atqarýshy Alına Túsipbaeva aıtty.
— 2025 jyly «ADC TAZA ALEM» JShS-yna qarasty qatty turmystyq qaldyqtar polıgonynda tirkelgen órttiń jalpy aýdany 12 gektar boldy, — dedi Alına Túsipbaeva.
Aıtýynsha, polıgonǵa 2020 jyldan 2027 jylǵa deıingi merzimge ekologııalyq ruqsat berilgen. Qujat boıynsha jylyna 7354 tonna qaldyq kómýge ruqsat etilgen. 2023–2025 jyldar aralyǵynda nysanda birneshe márte ekologııalyq zańnama talaptarynyń buzylýy tirkelgen.
— Qaldyqtardy saqtaý jáne jaǵý kezinde órt qaýipsizdigi men atmosferalyq aýany qorǵaý talaptarynyń saqtalmaýy anyqtaldy. QR ÁQBtK-niń 336-baby 1-bóligi boıynsha ákimshilik jaýapkershilik sharalary qoldanyldy. Atalǵan merzimde salynǵan aıyppuldardyń jalpy somasy 1 452 000 teńgege jetip, tolyq kólemde óndirildi, — dedi ol.
Sonymen qatar 2025 jyly polıgon aýmaǵynda tirkelgen órt faktileri boıynsha Almaty oblysynyń mamandandyrylǵan tabıǵat qorǵaý prokýratýrasy keshendi tekseris júrgizýge bastama kótergen.
Alına Túsipbaeva Іle aýdanyna qarasty Aşybulaq aýyldyq okrýgindegi zańsyz qaldyq tógilgen ýchaskeler boıynsha da aqparat berdi. Tereńqara ózeni boıynda ruqsatsyz tógilgen qurylys, turmystyq jáne óndiristik qaldyqtar anyqtalǵan.
— 2025 jylǵy 22 tamyzda tirkelgen bul quqyqbuzýshylyqtar boıynsha úsh tulǵaǵa ákimshilik aıyppul salyndy. Olarǵa ekologııalyq zańnama talaptaryn oryndaý, ózen arnasyn qalpyna keltirý jáne keltirilgen zalaldy óteý boıynsha nusqamalar berildi, — dedi maman.
Eske salaıyq, buǵan deıin Alataý qalasynyń qoqys polıgonyndaǵy iri órtke baılanysty jergilikti aýqymdaǵy tehnogendik sıpattaǵy tótenshe jaǵdaı rejımi engizildi.
Qatty turmystyq qaldyqtar polıgonyndaǵy órt bir aptadan keıin sóndirildi.