Almaty oblysynda bir adamnyń on shaqty ıti 52 jastaǵy áıeldi talaǵan
ALMATY. KAZINFORM – Áleýmettik jelide jerde jatqan áıeldi on shaqty ıttiń talap jatqany beınelegen jazba tarady.
Jelidegi málimetke sáıkes, oqıǵa Qarasaı aýdanynda bolǵan.
Almaty oblysynyń polıtsııa departamenti ıtterdiń 52 jastaǵy áıelge shabýyl jasaýyna baılanysty qylmystyq is tirkelgenin málimdedi. Qazirgi ýaqytta sotqa deıingi tergep-tekserý júrgizilip jatyr.
Tártip saqshylary jábirlenýshige qajetti medıtsınalyq kómek kórsetilgenin atap ótti.
- Jedel-izdestirý sharalary barysynda 60 jastaǵy ıtterdiń ıesi anyqtaldy. Ol qoǵamdyq tártipti buzǵany úshin ol zańnamada belgilengen tártippen jaýapkershilikke tartyldy, - dep habarlady departamentten.
Eske salaıyq, bıyl Almatyda qańǵybas janýarlardy aýlaý, ýaqytsha ustaý, veterınarııalyq óńdeý jáne halyqtyń qaýipsizdigin qamtamasyz etý boıynsha is-sharalardy júzege asyrýǵa jergilikti bıýdjetten 834,3 mln teńge bólindi.
Buǵan deıin Almatyda ıtti kólikten súıregen júrgizýshige is qozǵalǵanyn jazǵanbyz.