Almaty oblysynda bilim bóliminiń basshysy men 7 býhgalter sottaldy

ASTANA. KAZINFORM – Sybaılas jemqorlyqqa qarsy qyzmet bilim berý salasyndaǵy zańdylyqty qamtamasyz etý jónindegi jumystyń nátıjesinde Almaty oblysynda júıeli sybaılas jemqorlyq faktileriniń jolyn kesti.

Máselen, Almaty oblysynda Іle aýdandyq soty aýdandyq bilim bóliminiń basshysy L.Katkeevaǵa jáne osy bólimniń 7 býhgalterine qatysty úkim shyǵardy.

– Olar bilim berý salasynda naqty eńbek qyzmetin júzege asyrmaǵan adamdarǵa jalaqy aýdarý arqyly 686 mln teńge somasynda bıýdjet qarajatyn jymqyrǵany úshin kináli dep tanyldy. Sonymen qatar ol laýazymdyq ókilettikterin asyra paıdalanyp, óziniń júrgizýshisin vedomstvolyq baǵynysty mektep-gımnazııaǵa jalpy somasy 4,9 mln teńge jalaqy zańsyz tólengen kásiptik baǵdar berýshi laýazymyna jalǵan jumysqa ornalastyrǵan. Katkeeva memlekettik qyzmette qyzmet atqarýǵa ómir boıyna tyıym sala otyryp, 8 jylǵa bas bostandyǵynan aıyryldy, - delingen agenttik málimetinde.

Býhgalterlerge memlekettik qyzmette 10 jyl qyzmet atqarýǵa tyıym salynyp, 7 jyldan 8 jylǵa deıin bas bostandyǵynan aıyrý jazasy taǵaıyndaldy.

Sot aktisi zańdy kúshine engen joq. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.

Buǵan deıin Túrkistan oblysynda bóliminiń basshylary jáne 8 býhgalter sottalǵanyn jazǵan bolatynbyz.