Almaty oblysynda byltyr 3514 adamdy ıt qapqan
ALMATY. KAZINFORM – Almaty oblysynyń turǵyndaryn qaýipti qańǵybas ıtter máselesi búgingi kúni de alańdatady.
Jalpy, 2023 jyly Almaty oblysy Densaýlyq saqtaý basqarmasynyń vedomstvolyq uıymdarynda jabaıy ıt qaýyp, 3 514 adam medıtsınalyq kómekke júgingen. Onyń 1908-i — eresek adam, 1606-sy — bala. Al qaıtys bolý faktileri tirkelmegen. Bul máselege baılanysty Almaty oblysynyń Veterınarııa basqarmasyna saýal joldap, ıesiz ıtterge baılanysty qandaı jumystar atqarylyp jatqanyn suradyq.
Veterınarııa basqarmasy 2024 jyly «Iesiz janýarlardy aýlaý, ýaqytsha ustaý jáne jansyzdandyrý» baǵdarlamasyna oblystyq bıýdjetten 67,5 mıllıon teńge qarajat bólingenin habarlady. Aıtylǵan baǵdarlama aıasynda 15 myń bas qańǵybas ıt pen mysyqty aýlaý josparlanǵan.
- Iesiz janýarlardy aýlaýmen «Almaty oblysynyń veterınarııalyq stantsııasy» MKK-nyń 9 aýdandaǵy bólimderi men Qonaev qalalyq veterınarııalyq bóliminiń arnaıy ıt aýlaý toptary aınalysady: 10 avtokólik, 32 maman, 10 ızolıatordaǵy 145 dana tor. 2024 jyldyń basynan beri oblys aýmaǵynda 7 110 qańǵybas ıt aýlandy. Onyń ishinde ıeleri tabylǵan nemese ıtterdi ustaýǵa nıet bildirgen tulǵalarǵa 800 janýar qaıtaryldy, – dep jaýap berdi basqarmadan.
Sondaı-aq, Veterınarııa basqarmasynyń málimetinshe, 2023 jyly jalpy oblys aýmaǵynan 15 973 ıt jáne 162 mysyq aýlanǵan. 1952 ıt ıesine ne janýarlar qorǵaýshylar uıymdaryna qaıtarylǵan.
1200 qańǵybas ıtke vaktsına egilip, aýlanǵan ortaǵa qaıta jiberilse, 12 983 qańǵybas janýarlar jansyzdandyrylyp, ınsıneratorlar men mal qorymdarynda joıylǵan.
- Ustalǵan ıesiz janýarlar 9 aýdan men Qonaev qalalyq veterınarııalyq bólimderinde arnaıy 10 ızolıatordaǵy 145 dana torda ornalastyrylady. 4 táýlik ishinde, asyraýǵa alýǵa nıet bildirgen adamǵa beriledi. 4 kúnnen keıin adamǵa, janýarlarǵa shabýyl jasaǵan nemese adamnyń ómiri men densaýlyǵyna qater tóndiretin janýarlar, emdelmeıtin aýrýlarmen aýyratyn janýarlar Qazaqstan Respýblıkasynyń zańnamasynda tyıym salynbaǵan preparattarmen, dári-dármekpen (evtanazııamen) izgilikti túrde jansyzdandyrylady, – deıdi Veterınarııa basqarmasynan.
Aıta keteıik, úı mańaıynan qaýipti ıesiz ıtterdi baıqaǵan Almaty oblysyny turǵyndary +77477892532 baılanys telefonyna, 109 (aýhaldyq ortalyq) nómerine habaralasa alady nemese oblvetstantsiya24@mail.ru elektrondyq poshtasyna jazbasha ótinish joldaýǵa bolady.
Eske salaıyq, buǵan deıin Almaty qalasynda ornalasqan Kınologııa ortalyǵynda esirtki jáne ózge de tyıym salynǵan zattardy izdeıtin ıisshil ıtter qalaı daıyndalatynyn jazǵan edik.
