Almaty oblysynda bıyl jol apatynan 300 adam kóz jumdy
QONAEV. KAZINFORM – Almaty oblysynda bıyl jol-kólik oqıǵalary jıilegen. Bul týraly oblystyq polıtsııa departamenti ákimshilik polıtsııa basqarma bastyǵynyń orynbasary Erkebulan Ahmedov aıtty.
Resmı derekterge sáıkes, 2025 jyldyń 10 aıynda oblys joldarynda 3020 jol-kólik oqıǵasy tirkelgen. 2024 jyly bul ýaqytta 2469 jol apaty bolǵan. Sondaı-aq bıyl qańtar-qazan aılarynda jol-kólik oqıǵasy saldarynan 304 adam qaza boldy jáne 4539 adam dene jaraqatyn aldy.
- Jol apattarynyń sany 22,3 paıyzǵa, qaza bolǵandar 2,7 paıyzǵa jáne jaraqat alǵandar sany 33,8 paıyzǵa ósip otyr. Jol apattarynyń basty sebepteriniń biri – kólik júrgizýshileriniń jol qozǵalysy erejelerin saqtamaýy, - dedi Erkebulan Ahmedov.
Polıtsııa departamentiniń ókili jol qozǵalysyn retteý jáne jol apattarynyń aldyn alý maqsatynda 16 jedel aldyn alý is-sharalary ótkizilgenin atap ótti. Bul jumystar aıasynda jol erejesin buzý derekteri anyqtaldy:
- mas kúıinde kólik júrgizý (608-bap) boıynsha – 811;
- qarsy baǵytqa shyǵý (596-bap, 3-tarmaǵy) boıynsha – 1299;
- jaıaý júrginshige basymdyq bermeý (600-bap) boıynsha – 3292;
- jaıaý júrginshilermen jol erejelerin buzý (615-bap) boıynsha – 22 183.
- Jol apattary sebepteriniń biri – oblys aýmaǵyndaǵy joldardyń jaǵdaıy. Qoldanystaǵy barlyq joldarǵa 1423 tekserý júrgizildi, kemshilikterdi joıý týraly jol jóndeý mekemelerine uıǵarymdar jiberildi. Tekserý nátıjesinde 1682 dana jol belgisi, 6 baǵdarsham obektisi, 51 jol kedergisi, 1200 m trotýar ornatylyp, 93 jaıaý júrginshi ótkeli jaryqtandyryldy. 8308 m2 jol tańbalary syzyldy, - dedi ol.
Sondaı-aq ákimshilik polıtsııa basqarma bastyǵynyń orynbasary avtokólik joldary men jol qurylǵylaryn kútip ustaý talaptaryn oryndamaǵany úshin jol mekemelerinen 350 jaýapty tulǵa ákimshilik jaýapkershilikke tartylǵanyn atap ótti. Olarǵa 22 mln teńge aıyppul salynǵan.
Eske salaıyq, polıtsııa almatylyqtarǵa kóligin qysqa qazirden ázirleýdi eskertti.