Almaty oblysynda bıyl jańa 17 avtobýs baǵyty iske qosyldy

QONAEV.KAZINFORM - Almaty oblysynda kólik ınfraqurylymyn damytý baǵytynda aıtarlyqtaı jumystar atqarylyp jatyr. Bul týraly Almaty oblysy Jolaýshy kóligi jáne avtomobıl joldary basqarmasynyń basshysy Ermek Baımuhambetov Óńirlik kommýnıkatsııalar qyzmetinde ótken brıfıngte málimdedi.

Basqarma basshysynyń aıtýynsha, jyl basynan beri 44 eldi mekendi qamtıtyn jańa 17 avtobýs baǵyty iske qosylǵan. Osy baǵyttar boıynsha kúndelikti orta eseppen 5 myńnan astam jolaýshy tasymaldanady dep josparlanǵan.

Sondaı-aq Ermek Baımuhambetov Almaty oblysynda jóndeý josparlanǵan 137,4 shaqyrym joldyń 85%-y oryndalǵanyn atap ótti.

- Jalpy qazirgi ýaqytta 14 joba aıasynda 129 shaqyrym jergilikti mańyzy bar avtomobıl joldaryna ortasha jóndeý jáne 8,4 shaqyrymǵa kúrdeli jóndeý jumystary júrgizilip jatyr. Nátıjesinde, "Qapshaǵaı – Baqanas – Qaroı", "Ekaterınbýrg – Almaty" baǵyttary jáne basqa da aýyldarǵa kireberis joldarda asfalt jabyndysy tolyqtaı jańartylyp, qurylys-montaj jumystary aıaqtaldy. Mysaly, "Shelek – Sarybulaq – Aqtuǵan" baǵytynda 16,4 shaqyrym jol jóndeldi. Jyl sońyna deıin oblystaǵy jaqsy jáne qanaǵattanarlyq jaǵdaıdaǵy avtojoldardyń úlesin 93%-ke jetkizý josparlanyp otyr, - dedi ol.

Eske salaıyq, buǵan deıin Almaty oblysynda ıtti kólikpen súıregen adamnyń ústinen is qozǵalǵanyn jazǵanbyz.