Almaty oblysynda bıyl tutynýshylarǵa 13 mln teńge qaıtaryldy
ALMATY. KAZINFORM – Almaty oblysynyń Saýda jáne tutynýshylardyń quqyqtaryn qorǵaý departamenti 2026 jyldyń alǵashqy toqsanyn nátıjeli qorytyndylady.
Departament basshysy Jeńisbek Ahmetovtyń aıtýynsha, jyl basynan beri azamattardan 1313 ótinish túsken. Onyń ishinde elektrondy saýda, turmystyq qyzmetter, bilim berý, kommýnaldyq jáne medıtsınalyq qyzmetterge shaǵymdar sany artqan.
- Árbir ótinish jiti qaralyp, zań aıasynda naqty sharalar qabyldandy. Nátıjesinde 25 jospardan tys tekserý júrgizilip, 684 762 teńge kóleminde aıyppul salyndy. Sonymen qatar tutynýshylarǵa 13 281 000 teńgeden astam qarajat qaıtaryldy. Bul kórsetkish departament jumysynyń tıimdiligin jáne azamattardyń quqyqtaryn qorǵaýda naqty nátıjeler bar ekenin dáleldeıdi, - dedi ol.
Spıkerdiń aıtýynsha, saýda qyzmetin retteý baǵytynda da júıeli jumystar júrgizilip jatyr. Onyń ishinde áleýmettik mańyzy bar azyq-túlik taýarlarynyń baǵasyn turaqty deńgeıde saqtaýǵa mán berilgen.
- Departament saýda ústemesiniń shekti mólsherin saqtaý jáne baǵa belgileý talaptarynyń oryndalýyn turaqty baqylaýda ustaıdy. Jyl basynan beri 131 saýda sýbektisine qatysty 449 ákimshilik hattama toltyrylyp, 2 460 894 teńge kóleminde aıyppul salyndy, - dedi Jeńisbek Ahmetov.
Eske salaıyq, elordada 48 mln teńge tutynýshylarǵa qaıtaryldy.
