Almaty oblysynda bıyl 505 órt oqıǵasy bolyp, 13 adam qaıtys boldy

QONAEV. KAZINFORM — Almaty oblysynda jyl basynan beri 505 órt oqıǵasy tirkeldi. Almaty oblysy TJD Memlekettik órt baqylaý basqarmasynyń bastyǵy Samat Kenjehannyń aıtýynsha, bul ótken jylmen salystyrǵanda 10%-ǵa joǵary kórsetkish.

Spıker jyl ishinde órt saldarynan 13 adam qaza taýyp, 5 adam jaraqat alǵanyn atap ótti. Órtterdiń basym bóligi turǵyn úı sektorynda oryn alǵan. Tótenshe jaǵdaıdyń negizgi sebepteri: elektr jabdyqtaryn durys paıdalanbaý, turmystyq tehnıkalardy qoldanýdaǵy qatelikter jáne peshterdi ornatý men paıdalaný kezindegi buzýshylyqtar.

— Departament órt qaýipsizdigin arttyrý maqsatynda aýqymdy aldyn alý sharalaryn júrgizip jatyr. 15 tamyz ben 15 qyrkúıek aralyǵynda 3743 úıge tekserý júrgizildi. Nátıjesinde 459 úıde órt qaýipsizdigi erejeleriniń buzylǵany anyqtalyp, onyń 409-y sol jerde joıyldy. Jylytý maýsymynda 855 úıge 664 kómirtegi totyǵyn anyqtaıtyn datchık pen 191 tútin detektory ornatý josparlanǵan. Bizdiń basty mindetimiz — azamattardyń qaýipsizdigin qamtamasyz etý, - dedi Samat Kenjehan.

Eske salaıyq, buǵan deıin ShQO-da muqtaj otbasylar turatyn 1300-den astam úıde órt qaýipsizdigi erejeleri saqtalmaǵanyn jazǵanbyz.

Sondaı-aq úıden órt shyqqan jaǵdaıda ne isteý kerek ekenin jazǵan edik.