Almaty oblysynda bıyl 4 esirtki zerthanasy joıyldy
QONAEV. KAZINFORM — Almaty oblysynda «Qarasora-2026» jedel-profılaktıkalyq is-sharasynyń qorytyndylary usynyldy.
Almaty oblysy óńirlik kommýnıkatsııalar qyzmetinde oblystyq polıtsııa departamenti bastyǵynyń birinshi orynbasary Baǵdat Áshimov esirtkiniń zańsyz aınalymyna qarsy kúres jumystary týraly baıandady. Onyń aıtýynsha, qabyldanǵan sharalardyń nátıjesinde zańsyz aınalymnan jalpy salmaǵy 12 tonna 674 keli 631 gramm esirtki zaty tárkilendi.
«Qarasora-2026» jedel-profılaktıkalyq is-sharasy júrgizilgen eseptik kezeńde 83 esirtki qylmysy tirkelgen. Sıntetıkalyq esirtki óndirýmen aınalysqan 4 jasyryn zerthana anyqtalyp, jumysy toqtatylǵan. Odan bólek 278 ákimshilik quqyq buzýshylyq anyqtalǵan.
— Atalǵan nátıjeler esirtki qylmystaryna qarsy kúrestiń birneshe negizgi baǵyty boıynsha júıeli jumystar júrgizilgenin kórsetedi. Bul rette bizdiń jumysymyz tek esirtki zattaryn anyqtap, tárkileýmen ǵana shektelmeıdi. Eń basty basymdyq zańsyz aınalymnyń joldaryn joıýǵa, esirtki zattarynyń taralýyna múmkindik beretin arnalardy anyqtaýǵa jáne qylmystyq qyzmetten túsetin qarjy kózderin buǵattaýǵa baǵyttaldy, — dedi Baǵdat Áshimov.
Ol ınternet arqyly esirtki zattaryn jarnamalaý men taratý derekterine de erekshe nazar aýdarylǵanyn atap ótti. Bıyl polıtsııa kúshimen esirtki zattaryn jarnamalaǵan 695 ınternet-resýrs buǵattalǵan. Sonymen qatar esirtki saýdasynan túsken qylmystyq kiristerdiń qarjylyq qozǵalysyn shekteý maqsatynda «Antıfrod-ortalyǵy» júıesine 20 470 tólem derektemesi engizilgen.
— Jedel is-sharalar barysynda birqatar iri esirtki qylmystarynyń joly kesildi. Nátıjesinde 32 adam ustalyp, ýaqytsha ustaý ızolıatoryna qamaldy, — dedi polıtsııa bastyǵynyń birinshi orynbasary.
Eske salaıyq, Esirtki taratýshylardy ustaýǵa kómektesken ShQO turǵyndary mln teńgeden astam syıaqy aldy.