Almaty oblysynda bazardaǵy dámhanadan 19 adam ýlandy
QONAEV. KAZINFORM — Almaty oblysy Boraldaı kentindegi «Alataý» bazarynda ornalasqan «Sushi Time» tamaqtaný orny ýaqytsha jabyldy.
Іle aýdandyq sanıtarııalyq-epıdemıologııalyq baqylaý basqarmasynyń málimetinshe, taǵamnan ýlaný belgilerimen 19 adam aýrýhanaǵa jatqyzylǵan. Aldyn ala málimet boıynsha olardyń barlyǵy «Sushi Time» dámhanasynda tamaqtanǵan.
— Alǵashqy shaǵymdar túse bastaǵan boıda bul iske densaýlyq saqtaý organdary men jergilikti atqarýshy bılik ókilderi jumyldyryldy. Qazir Іle aýdandyq sanıtarııalyq-epıdemıologııalyq baqylaý basqarmasy tekserý júrgizip jatyr. Zerthanalyq zertteýler úshin taǵam ónimderinen synamalar alynyp, tıisti materıaldar ýákiletti organdarǵa joldandy. Oqıǵanyń naqty sebepteri týraly túpkilikti qorytyndy tekserý jumystary tolyq aıaqtalyp, zerthanalyq zertteýlerdiń nátıjeleri shyqqannan keıin jasalady, — delingen basqarma málimdemesinde.
Sonymen qatar sanıtarııalyq-epıdemıologııalyq baqylaý basqarmasynyń mamandary taǵamnan ýlaný belgileri baıqalǵan nemese densaýlyq jaǵdaıy nasharlaǵan jaǵdaıda ýaqyt sozbaı, tez arada medıtsınalyq kómekke júginýge shaqyrdy. Onyń ishinde qusý, ish ótý nemese dene qyzýynyń kóterilýi sııaqty alǵashqy belgiler paıda bolǵanda óz betinshe emdelýge bolmaıtyny atap ótildi.
Eske salaıyq, buǵan deıin maman qandaı taǵamdardan ýlaný qaýpi joǵary ekenin aıtqan bolatyn.
