Almaty oblysynda balany ıtten qutqarǵan er adam marapattaldy
QONAEV. KAZINFORM – Almaty oblysynyń ákimdigi 10 jasar balany ıt shabýylynan aman alyp qalǵan Almalybaq aýylynyń turǵyny Serikbek Saqaıbaevty marapattady.
Almaty oblysy ákimdiginiń málimetinshe, 30 maýsym kúni Almalybaq aýylynda ornalasqan fýtbol alańynda 10 jastyǵy Maksımge birneshe ıt shabýyl jasap, bala aýyr jaraqat aldy.
– Oqıǵa ornyna quzyrly organ ókilderi kelgenshe aýyl turǵyny Serikbek Saqaıbaev ómirine tóngen qaýipti elemeı, ıtke qarsy turyp, balany ólim aýzynan arashalap qaldy. Bul – naǵyz azamattyq batyldyq pen shynaıy erliktiń úlgisi,– dep atap ótti ákimdikten.
Serikbek Saqaıbaevtyń batyldyǵy eleýsiz qalmady. Qarasaı aýdany ákiminiń mindetin atqarýshy Rýstam Atshabarov oǵan alǵys hat pen demeýshiler atynan qarjylaı syılyq tabystady.
Sonymen qatar, sharaǵa aýdandyq polıtsııa basqarmasynyń basshysy Nusqabek Zaýlanbaev pen tótenshe jaǵdaılar bóliminiń basshysy Baǵdat Sháripbekov arnaıy kelip, Serikbek Saqaıbaevqa alǵys hat pen estelik syılyq berdi.
Eske sala keteıik, buǵan deıin Almaty oblysy Qarasaı aýdanynda fýtbol alańynda oınap júrgen balaǵa jeke aýmaqtan shyǵyp ketken úsh ıt shabýyl jasaǵanyn jazǵan edik.
Keıin Bas prokýratýra atalǵan fakt boıynsha qylmystyq is qozǵalǵanyn habarlady.
Sondaı-aq Almaty oblysynyń polıtsııa departamenti balany ıtterdiń shabýylynan aman alyp qalǵan er adamnyń jaýapqa tartylatyny týraly áleýmettik jelide taraǵan aqparatty joqqa shyǵardy.