Almaty oblysynda balalarǵa dinı dáris zańsyz júrgizilgen
QONAEV. KAZINFORM – Almaty oblysy Jambyl aýdanynda kámeletke tolmaǵandar arasynda zańsyz dinı oqytý deregi anyqtaldy.
Almaty oblysy din isteri basqarmasynyń málimetinshe, bıyl 21 qazanda Uzynaǵash aýylynda túsken jedel aqparatty tekserý maqsatynda ıývenaldyq polıtsııa, jergilikti polıtsııa qyzmeti, prokýratýra, oblystyq Din isteri basqarmasy, sondaı-aq ishki saıasat jáne bilim bólimderiniń ókilderi birlesken reıdik is-shara júrgizgen. Tekserý kezinde destrýktıvti dinı aǵymdy ustanýshy A. esimdi azamat jeke menshik nysanynda kámeletke tolmaǵan balalarǵa arab tili men Qurannan zańsyz dárister júrgizip kelgeni anyqtaldy.
- Bilim bólimi men mektep ákimshilikteriniń úılestirýimen oqıǵa ornyna oqýshylardyń ata-analary shuǵyl túrde shaqyryldy. Júrgizilgen quqyqtyq baǵalaý nátıjesinde, balalarǵa zańsyz dinı dáris ótkizgen azamat QR Ákimshilik quqyq buzýshylyq týraly kodeksiniń 490-baby 1-bóligi 1-tarmaǵyna (dinı qyzmet jáne dinı birlestikter týraly zańnamasyn buzý) sáıkes ákimshilik jaýapkershilikke tartyldy, - dep habarlady basqarmadan.
Sonymen qatar kámeletke tolmaǵan balalaryn tárbıeleý jónindegi mindetterdi oryndamaǵany úshin ata-analarǵa qatysty ÁQBtK-niń 127-baby aıasynda eskertý jasalǵan.
Eske salaıyq, buǵan deıin Almaty oblysynda tyıym salynǵan «Hızb ýt-Tahrır» uıymynyń jasyryn toby anyqtaldy.
