Almaty oblysynda Balalar quqyqtaryn qorǵaý basqarmasynyń basshysy taǵaıyndaldy
QONAEV. KAZINFORM – Almaty oblysy ákiminiń ókimimen Dáýlet Shaıtursyn Almaty oblysynyń balalar quqyqtaryn qorǵaý basqarmasynyń basshysy bolyp taǵaıyndaldy.
Oblys ákimdiginiń málimetinshe, bul basqarma osy jyldyń 11 naýryzynda Memleket basshysynyń balalardy qorǵaý júıesin kúsheıtý jónindegi tapsyrmasyna sáıkes quryldy.
Dáýlet Shaıtursyn 1988 jyly týǵan, bilimi – joǵary. Qorqyt Ata atyndaǵy Qyzylorda memlekettik ýnıversıtetin «Qazaq tili men ádebıeti» mamandyǵy, Turan ýnıversıtetin «Menedjment» mamandyǵy boıynsha bitirgen.
Eńbek jolyn 2008 jyly «QyzylordaOtyn» JShS dırektorynyń kómekshisi bolyp bastaǵan. Ár jyldary «ABK-Qurylys» JShS dırektorynyń birinshi orynbasary, dırektory, Qyzylorda oblystyq fılarmonııasynyń bas ákimshisi, oblys ákimi apparatynyń ınspektory, «Baıqońyr» ÁKK» QB» AQ uıymdastyrý-baqylaý jumysy bóliminiń bastyǵy, Qorqyt Ata atyndaǵy Qyzylorda memlekettik ýnıversıtetiniń mamany, Almaty qalasy ákimi apparatynyń bas mamany, bas ınspektory, Jetisý aýdany ákimi apparatynyń basshysy, aýdan ákiminiń orynbasary qyzmetterin atqarǵan.
Ótken jyldyń naýryzyna deıin Almaty oblysynyń Tilderdi damytý jónindegi basqarma basshysy, oblys ákimi apparaty basshysynyń orynbasary laýazymdarynda, keıin Qazaqstan Respýblıkasy Úkimeti apparatynyń óńirlik ınspektory bolyp eńbek etti.
Eske salaıyq, buǵan deıin Almatyda balalardyń quqyǵyn qorǵaý jónindegi jańa basqarma qurylatynyn jazǵanbyz.
