Almaty oblysynda áıeldi arqanmen býyndyrmaq bolǵan adam izdestirilip jatyr
QONAEV. KAZINFORM – Áleýmettik jelide Almaty oblysynyń Shamalǵan aýylynda áıelge jasalǵan shabýyl týraly aqparat tarady.
Jazba avtorlarynyń málimetinshe, beıtanys er adam áıeldiń moınyna arqan salyp, ony tunshyqtyrmaq bolǵan. Alaıda áıel qashyp qutylyp úlgergen.
Jábirlenýshiniń týystary kúdiktiniń áli kúnge deıin tabylmaǵanyn aıtyp, oqıǵa ornyndaǵy beınebaqylaý kameralarynyń jazbalary bar ekenin aıtqan.
Buǵan qatysty Almaty oblysynyń polıtsııasy túsinik berdi.
– Bul fakti boıynsha qylmystyq is qozǵaldy. Qazirgi ýaqytta oqıǵanyń mán-jaıyn jáne kúdiktini anyqtaýǵa baǵyttalǵan jedel-izdestirý jáne tergeý sharalarynyń kesheni júrgizilip jatyr, - dep habarlady polıtsııanyń baspasóz qyzmeti.
Vedomstvonyń málimetinshe, atqarylǵan jumystardyń nátıjesi boıynsha quqyqtyq baǵa berilip, tıisti protsessýaldyq sheshim qabyldanady.
Tergeý jalǵasyp jatyr.
Eske salaıyq, buǵan deıin Almaty oblysynda polıtsııa qyzmetkeri áıelin kólikpen qaǵyp óltirgenin habarlaǵanbyz.
