Almaty oblysynda áıeli men enesin uryp-soqqan azamat ustaldy

QONAEV. KAZINFORM — Almaty oblysynda 31 jastaǵy er azamat áıeli men enesine qol kótergen. 

Jelidegi beınerolıkten er adamnyń úı aýlasynda aldymen áıeldi, keıin onyń anasyn belgisiz zatpen uryp jatqanyn kórýge bolady. 

Almaty oblysynyń polıtsııa departamenti atalǵan derek boıynsha 31 jastaǵy azamat ustap, ýaqytsha ustaý ızolıatoryna qamalǵanyn habarlady.

— Er adam men onyń jubaıy arasynda janjal týyndaǵany anyqtaldy. Oqıǵa barysynda áıelge jáne onyń anasyna dene jaraqattary keltirilip, sondaı-aq múlikteri qasaqana búlingen. Bolǵan jaıtqa baılanysty Qylmystyq kodekstiń eki baby boıynsha is tirkeldi. Qazirgi ýaqytta oqıǵanyń mán-jaıyn jan-jaqty, tolyq jáne obektıvti anyqtaýǵa baǵyttalǵan barlyq qajetti tergeý áreketteri júrgizilip jatyr, — dep habarlady departamentten.

Eske salaıyq, buǵan deıin polıtsııa Jetisý oblysynda balany uryp-soqqan áıeldi ustady.