Almaty oblysynda áıel bosaný kezinde alty isikten qutyldy
QONAEV. KAZINFORM — Almaty kópsalaly klınıkalyq aýrýhanasynda jatyrdyń kóptik mıomasy dıagnozy qoıylǵan 35 jastaǵy áıelge kúrdeli ota sátti jasaldy.
Almaty ákimdigi baspasóz qyzmetiniń habarlaýynsha, josparly kesar tiligi kezinde dárigerler náresteni aman-esen bosandyryp, bir mezette jatyrdaǵy alty mıoma túıinin alyp tastady. Kúrdeli hırýrgııalyq aralasý barysynda dárigerler jatyrdy saqtap qaldy.
Oblys turǵynynda jatyr mıomasy júktiliktiń erte kezeńinde anyqtalǵan. Soǵan qaramastan, dárigerlerdiń turaqty baqylaýynyń arqasynda áıel júktilikti 37 aptaǵa deıin sátti kóterip shyqqan.
Júktilik merzimi tolyq jetkennen keıin mamandar josparly túrde operatsııalyq jolmen bosandyrý týraly sheshim qabyldady. Áýeli deni saý sábı dúnıege kelip, odan keıin mıomektomııa jasaldy.
Operatsııa barysynda kólemi 4-ten 10 santımetrge deıin jetetin alty mıoma túıini alyndy. Oǵan úsh akýsher-gınekolog qatysty.
Almaty kópsalaly klınıkalyq aýrýhanasy dırektorynyń orynbasary Gúljahan Jumadýllaevanyń aıtýynsha, jatyr mıomasy áıeldiń ana ataný múmkindigin shektemeıdi, alaıda mundaı jaǵdaıda mamandardyń turaqty baqylaýy qajet.
— Árbir jaǵdaı jeke qarastyrylady. Sondyqtan áıelder gınekologtyń turaqty baqylaýynda bolyp, ýaqytyly tekserýlerden ótip, júktilikti josparlaý máselesin dárigermen aldyn ala talqylaǵany jón. Erte dıagnostıka men durys tańdalǵan emdeý taktıkasy reprodýktıvtik densaýlyqty saqtap, ana atanýǵa múmkindik beredi, — dedi Gúljahan Jumadýllaeva.
Eske salaıyq, buǵan deıin Qazaqstanda ókpeniń sırek aýrýyna shaldyqqan patsıentke alǵash ret kúrdeli ota jasalǵanyn habarlaǵanbyz.
