Almaty oblysynda avtojol men demalys aımaqtaryn sý basty
QONAEV. KAZINFORM — Almaty oblysynyń Eńbekshiqazaq aýdanynda jaýyn-shashyn saldarynan Túrgen ózenindegi sý deńgeıi kóterildi.
Eńbekshiqazaq aýdany ákimdiginiń málimetinshe, sý deńgeıiniń kóterilýinen «Túrgen — Asy» avtojolynyń 25-shaqyrymyndaǵy jol bóligin sý basqan.
Sondaı-aq Túrgen ózeniniń boıyndaǵy aýmaqtardyń sý astynda qalǵany tirkeldi. Atap aıtqanda, 6–9 shaqyrym aralyǵynda 6 kıiz úı jáne «Túrgensaı» demalys aımaǵy ornalasqan. Qoldan jasalǵan jaıaý júrginshiler kópirleri ishinara zaqymdalǵan.
— Tekserý barysynda Úlken Almaty kanalynyń (ÚAK) boıyndaǵy avtojoldyń 54-shaqyrymynda ornalasqan kópirdiń sý ótkizgish qurylymy aınalasyndaǵy topyraqty sý shaıyp jatqany anyqtaldy. Atalǵan kópir 2024 jyly apatty jaǵdaıda dep tanylǵan bolatyn. Jumystardy úılestirý maqsatynda aýdany ákim, sondaı-aq aýmaqtyq bólimsheler, polıtsııa, tótenshe jaǵdaılar qyzmetteri men basqa da múddeli memlekettik organdar jetekshileri men bastyqtarynyń qatysýymen jedel shtab uıymdastyryldy, — dep habarlady ákimdikten.
Qazirgi ýaqytta týrıstik nysandar men týrıstik aımaqtarda bolǵan demalýshylardy evakýatsııalaý jumystary júrgizilip jatyr.
Sondaı-aq Almaty oblysynyń TJD oblystyq mańyzy bar KV-49 «BAK kanaly boıyndaǵy avtomobıl joly» avtojolynda kóliktiń barlyq túrleri úshin qozǵalys ýaqytsha toqtatylǵanyn málimdedi. Shekteý Eńbekshiqazaq aýdanyndaǵy taýly aýmaqta nóser jaýyn-shashyn saldarynan Túrgen ózeniniń aǵysy kúsheıip, jol qozǵalysy qaýipsizdigine qaýip tónýine baılanysty engizildi.
Eske salaıyq, buǵan deıin jaýynǵa baılanysty Almaty ózenderinde sý deńgeıi kóterilgen bolatyn.
