Almaty oblysynda aýyr júk tasymaldaıtyn tirkemeler óndirisi iske qosylady
QONAEV. KAZINFORM — Premer-mınıstrdiń orynbasary Qanat Bozymbaev Almaty oblysynyń Qarasaı aýdanyna jasaǵan jumys saparynda 200 tonnaǵa deıingi aýyr júk kóteretin tirkemeler óndirýdi kózdeıtin jańa ındýstrııalyq jobanyń júzege asyrylý barysymen tanysty. Bul týraly Úkimettiń baspasóz qyzmeti habarlady.
Óndiris ındýstrııalyq-óndiristik «Altyn taǵa» kesheni bazasynda ornalastyrylady. Munda jeke tseh qalyptastyrylyp, jaqyn arada arnaıy jabdyqtardy jetkizý jáne montajdaý jumystary júrgiziledi.
«Altyn taǵa» kesheni óńirdegi negizgi óndiristik nysandardyń biri sanalady. Munda qalalyq jáne joǵary kerneýli elektr berý jelilerine arnalǵan temirbeton tirekter shyǵarylady. Kásiporynnyń táýligine ortasha óndiristik qýaty 300-den astam konstrýktsııany quraıdy, bul eldegi ınvestıtsııalyq jobalardyń shamamen 90%-ynyń qajettiligin qamtamasyz etýge múmkindik beredi.
Kásiporynda zamanaýı tehnologııalyq sheshimder engizilýde.
— Bul tseh PIR sendvıch-panelderin óndiretin zamanaýı jelimen jabdyqtalǵan. Mundaı óndiristik jeli Qazaqstanda alǵash ret iske qosylyp otyr. Óndiristik qýaty jylyna 1,5 mln sharshy metr panel shyǵarýǵa múmkindik beredi. Ónimniń basty artyqshylyǵy — joǵary jylý oqshaýlaý jáne energııa tıimdiligi, bul ǵımarattardy jylytý men paıdalanýǵa ketetin shyǵyndardy aıtarlyqtaı azaıtady. Gıgroskopııalyq qasıetteriniń bolmaýy panelderdiń qyzmet etý merzimin 50 jylǵa deıin qamtamasyz etedi, — dedi kásiporynnyń kommertsııalyq dırektory Valerıı Ýhvatov.
Sonymen qatar kásiporyn jyl saıyn 500 myń sharshy metrge deıin trotýar plıtalaryn, shamamen 6 myń dana mashına jasaý ónimderin, 6 myń tonnadan astam metall konstrýktsııalaryn jáne 1,5 mln sharshy metrge deıin sendvıch-panel shyǵarady.
Keshendi damytýdyń basym baǵyttarynyń biri — otandyq ónerkásip úshin strategııalyq mańyzy bar aýyr júk tasymaldaıtyn tirkemeler óndirisin iske qosý.
— Biz 200 tonnaǵa deıingi júk kótergish tirkemeler óndirisin jolǵa qoıýdy josparlap otyrmyz. Bizdiń baǵalaýymyz boıynsha, Qazaqstanǵa jyl saıyn negizinen Qytaıdan shamamen 2 myńǵa jýyq tirkeme men kran-balka ákelinedi, al mundaı tehnıka el ishinde óndirilmeıdi. Bizdiń maqsatymyz — ishki naryqty sapaly ónimmen qamtamasyz etip, eksportqa shyǵý, — dedi kompanııa dırektory Álisher Nurmaǵanbet.
Qazirgi ýaqytta kásiporynda óńirdiń 300-den astam turǵyny jumyspen qamtylǵan.
Óndiris alańymen tanysý barysynda Qanat Bozymbaev tıisti memlekettik organdarǵa shyǵarylatyn uzyn ólshemdi avtomobıl tirkemeleri men statsıonarlyq kótergish mehanızmderdi sertıfıkattaý jáne synaqtan ótkizýdi qamtamasyz etýdi tapsyrdy.
Sonymen qatar vıtse-premer kásiporynda shyǵarylatyn temirbeton ónimderin sý salasyn damytýdyń keshendi jospary aıasynda ırrıgatsııalyq jelilerdi jańǵyrtýda, sondaı-aq EKSJ ulttyq jobasyn iske asyrý sheńberinde energetıkalyq ınfraqurylymdy jańartýda keńinen qoldanýdy tapsyrdy. Bul júzege asyrylyp jatqan jobalardaǵy otandyq qamtý úlesin arttyrýǵa múmkindik beredi.
Aıta ketelik Premer-mınıstrdiń orynbasary Qanat Bozymbaev Almaty oblysynda sý resýrstaryn tıimdi paıdalaný jáne aýyldyq aımaqtardy turaqty damytý máseleleri boıynsha keńes ótkizgen edi.