Almaty oblysynda aýyl turǵyndary jyldar boıy kútken gaz qashan júrgiziledi
QONAEV. KAZINFORM – Almaty oblysynyń ákimdigi Jambyl aýdanyna qarasty Jaısan aýylyn gazben qamtamasyz etý máselesine qatysty túsinikteme berdi.
Áleýmettik jelilerde 10 jyldan astam ýaqyt buryn bul aýyldy gazdandyrýǵa mıllıondar teńge bólingenimen, gaz kirmegeni týraly aqparat tarady.
Jelidegi derekterge sáıkes, merdiger kompanııa tek qubyrlardy tartyp, keıin jabdyqtardy satyp jibergen jáne jumysty aıaqsyz qaldyrǵan. Qazir aýyl halqy kómir satyp alyp, pesh jaǵyp otyrýǵa májbúr.
Oblys ákimdiginiń jaýabyna sáıkes, 2023 jyly Energetıka jáne turǵyn úı sharýashylyǵy basqarmasy Jaısanda gaz qubyrlary men jelilerin salýǵa baıqaý ótkizgen. Bas merdiger retinde «TýrGaz» JShS belgilengen.
— 2024 jyly aýylishilik jelilerdi júrgizý aıaqtaldy jáne jetkizýshi gaz qubyry qalpyna keltirildi. 2025 jylǵy mamyrda saǵatyna 15 myń tekshe metr gaz berýge qaýqarly «Qazbek bek» avtomattandyrylǵan gaz taratý stansasy salyndy. Bul nysan Jaısan aýylyn da gazben qamtýǵa múmkindik beredi. Úılerdi gazǵa qosý jeliler «Intergaz Ortalyq Azııa» AQ-nyń qaramaǵyna qabyldanǵannan keıin bastalady. Jumystardy 2025 jylǵy 15 qazanǵa deıin aıaqtaý josparlanǵan, — delingen resmı jaýapta.
Sondaı-aq oblys ákimdigi «TýrGaz» JShS tek bas merdigerdiń qyzmetinin atqarǵanyn, úılerdi gazǵa qosý máseleleri qyzmet kórsetýshi kompanııalar men tutynýshylar arasynda tikeleı júzege asyrylatynyn habarlady.
Eske salaıyq, buǵan deıin elordany tolyq gazdandyrý qashan aıaqtalatynyn jazǵanbyz.