Almaty oblysynda aýyl ákimi tizgindegen kólik aýdarylyp qaldy

QONAEV. KAZINFORM – Almaty oblysynda aýyl ákimi basqarǵan kólik jol apatyna ushyrady.

Jelidegi málimetke sáıkes, Talǵar aýdany Panfılov aýyldyq okrýginiń ákimi Dýlat Daýletalıev basqarǵan kólik aýdarylyp, 38 jastaǵy jolaýshy mert bolǵan. Al ákimniń ózi men 34 jastaǵy jolaýshy jaraqat alǵan.

Talǵar aýdany ákiminiń apparaty bul derekti rastap, resmı málimdeme jasady.

- Panfılov aýyldyq okrýgi ákimi túsken jol apaty boıynsha sotqa deıingi tergeý júrgizilip jatyr. Qazirgi ýaqytta memlekettik qyzmetshi aýrýhanada, sondyqtan ýaqytsha qyzmettik tergeý júrgizý múmkin emes. Protsessýaldyq áreketter aıaqtalyp, memlekettik qyzmetshi jumysqa shyqqannan keıin tártiptik shara qoldaný máselesi Ádep keńesiniń qaraýyna shyǵarylady, - dep habarlady aýdan ákimdigi.

Eske salaıyq, buǵan deıin Almaty oblysy ákiminiń orynbasary jol apatyna ushyraǵanyn jazǵanbyz.