Almaty oblysynda aýdıt nátıjesinde birneshe aýyl ákimine aıyppul salyndy
QONAEV. KAZINFORM — Almaty oblysy boıynsha tekserý komıssııasy Jambyl aýdanyndaǵy memlekettik mekemelerge júrgizilgen aýdıt barysynda zańbuzýshylyqtar anyqtaǵan.
Oblystyq komıssııa múshesi Qýanysh Esenamanovtyń aıtýynsha, bıýdjet qarajaty men memleket aktıvterin paıdalaný tıimdiligin baǵalaýǵa baǵyttalǵan tekserý 2024 jyldyń 1 qańtary men 2025 jyldyń 31 jeltoqsany aralyǵyn qamtyǵan. Jalpy somasy 22,8 mlrd teńgeden astam qarajat qaralǵan aýdıt nátıjesinde 2,7 mlrd teńgege jýyq buzýshylyq anyqtaldy. Bul kórsetkish eki jyl burynǵy tekserýmen salystyrǵanda 5 esege joǵary.
Sonymen qatar bıýdjet qarajatyn josparlaý men ıgerýde de eleýli kemshilikter bolǵan. Aýdıtorlardyń málimetinshe, jaýapty organdar arasyndaǵy úılestirýdiń álsizdigi men taldaý jumystarynyń jetkiliksizdigi saldarynan 2,5 mlrd teńge tıimsiz josparlanyp, 83,4 mln teńge tıimsiz jumsalǵan.
— Zań talaptaryn buzýǵa jol bergen memlekettik mekemelerdiń 31 qyzmetkeri tártiptik jaýapkershilikke tartyldy. Odan bólek ÁQBtK-niń birneshe baby boıynsha jalpy somasy 1,1 mln teńgeden astam aıyppul salyndy. Al eki aýyldyq okrýg ákimine qysqartylǵan tártippen 434 myń teńge kóleminde aıyppul salynyp, tolyq óndirildi, — dedi spıker.
Eske salaıyq, Shymkentte aýdıt nátıjesinde 43,3 mlrd teńgeniń zań buzýshylyǵy áshkere boldy.
