Talǵar qalasyndaǵy tóbelesten bir adam qaıtys boldy

QONAEV. KAZINFORM – Almaty oblysy Talǵar qalasynda túngi ýaqytta tóbeles bolyp, saldarynan bir adam mert boldy. Polıtsııa kisi óltirý faktisi boıynsha  qylmystyq is qozǵady. 

Almaty oblysy Polıtsııa departamentiniń málimetine sáıkes, Talǵar qalasynda 4 qazanǵa qaraǵan túni jas jigitter arasynda janjal týyndaǵan. Kıkiljiń qarýly qaqtyǵysqa ulasyp, saldarynan eki jigit aýdandyq aýrýhanaǵa jetkizildi. Olardyń biri alǵan jaraqatynan jansaqtaý bóliminde qaıtys boldy.

– Kisi óltirý faktisi boıynsha polıtsııa qylmystyq is qozǵady. Oqıǵanyń barlyq qatysýshysy ustaldy jáne ýaqytsha ustaý ızolıatoryna qamaldy. Qazirgi ýaqytta istiń barlyq mán-jaıynyń tolyqtyǵyn, jan-jaqtylyǵyn jáne obektıvtiligin qamtamasyz etý úshin qajetti tergeý is-sharalary júrgizilip jatyr. Qylmystyq isti tergeý oblystyq polıtsııa departamenti basshylyǵynyń erekshe baqylaýynda bolady, - dep habarlady oblystyq PD baspasóz qyzmeti. 

Sondaı-aq oblystyq PD tergeý múddesi úshin ózge de aqparat jarııalaýǵa jatpaıtynyn eskertti.

Eske salaıyq, buǵan deıin Almatyda sheteldik azamattyń ólimi tekserilip jatqanyn jazǵan edik.