Almaty oblysynda áskerı tehnıkany tasymaldaý erejelerin buzǵan júrgizýshige aıyppul salyndy

QONAEV. KAZINFORM – Qonaev qalasynyń mamandandyrylǵan aýdanaralyq ákimshilik quqyq buzýshylyqtar jónindegi soty ÁQBtK-niń 610-babynyń 1-bóligi boıynsha M. qatysty ákimshilik quqyq buzýshylyq týraly isti qarady.

– Іs materıaldaryna sáıkes, 2025 jyldyń 15 qańtarynda saǵat 13:25-te júrgizýshi M. «KAMAZ» júk avtokóligimen áskerı tehnıkany tasymaldaǵan. Almaty-Óskemen avtojolynyń 56-shy shaqyrymynda burylý kezinde kólik tralynan eki áskerı tehnıka túsip ketip, jolda aýdarylyp, artynsha «Ssang Yong Actyon» avtokóligimen soqtyǵysqan,– dep habarlady Almaty oblysynyń Qonaev qalasy ákimshilik quqyq buzýshylyqtar jónindegi mamandandyrylǵan aýdanaralyq sotynyń baspasóz qyzmeti. 

Sot otyrysynda M. kinásin moıyndap, qatań jazalamaýdy ótingen.

Jábirlenýshi, áskerı polıtsııa ókili O. hattamada kórsetilgen mán-jaılardy rastady, sottan oǵan zańǵa sáıkes jaza taǵaıyndaýdy surady.

Jınalǵan dálelder, onyń ishinde júrgizýshiniń kinásin moıyndaýy, ákimshilik quqyq buzýshylyq týraly hattama jáne basqa da materıaldar negizinde sot júrgizýshi M.-ny ÁQBtK-niń 610-babynyń 1-bóligine sáıkes kináli dep tanydy.

Aıyptalýshyǵa 55 048 teńge aıyppul salyndy.

Eske salaıyq, buǵan deıin «Almaty-Óskemen» avtojolynda áskerı tehnıka jol apatyna ushyraǵany týraly jazǵan edik.