Almaty oblysynda alıment tóleýden jaltarǵan 95 adam qamaýǵa alyndy
ASTANA. KAZINFORM — Almaty oblysynyń prokýrorlary 500 mln teńge alıment óndirdi, dep habarlaıdy vedomstvonyń baspasóz qyzmeti.
Bıylǵy jyldyń úsh aıynda alıment boıynsha 500 mln teńge somaǵa bereshek óteldi. 13 qasaqana tólemeýshige qatysty QR QK-niń 139-baby boıynsha qylmystyq is qozǵaldy (balalardy asyraýǵa qarajat tóleý jónindegi mindetterdi oryndamaý). Onyń ishinde 3 adam naqty jazalaý sharalarymen sottaldy, qalǵandary boıynsha sotqa deıingi tergeýler júrgizilip jatyr.
Bir mezgilde prokýratýranyń bastamasy boıynsha 107 boryshker ákimshilik jaýapkershilikke tartyldy, onyń 95-i 5 táýlikke deıingi merzimge ákimshilik qamaýǵa alyndy.
Sonymen qatar, balalardyń paıdasyna jalpy quny 32 mln teńge bolatyn 8 múlik obektisi (jer ýchaskeleri, turǵyn úıler jáne avtokólik) berildi. Mysaly, boryshkerlerdiń biri bereshekti óteý esebinen óndirip alýshyǵa quny 7,5 mln teńge bolatyn jer ýchaskesin berdi.
— Qabyldanǵan sharalar ata-ana mindetterin oryndaýdan ádeıi jaltarǵan adamdar úshin jaýapkershiliktiń sózsiz bolýynyń turaqty tájirıbesin qalyptastyrady. Alıment mindettemeleri áleýmettik mańyzy bar jáne balalardyń quqyqtary men ál-aýqatyn qorǵaýǵa tikeleı áser etedi, — dep habarlaıdy prokýratýra.
Alıment tóleýden jaltarýdyń árbir faktisi zańda belgilengen tártippen jolyn kesetin bolady.
Budan buryn ShQO-da 328 balanyń paıdasyna 80 mln teńge alıment óndirilgenin jazdyq.
