Almaty oblysynda «Alataý» ıpotekalyq baǵdarlamasyna qujat qabyldaý bastalady

QONAEV. KAZINFORM — Almaty oblysynda 25 tamyz kúni «Alataý» ıpotekalyq baǵdarlamasyna ótinim qabyldaý bastalady. Bul týraly oblystyń turǵyn úı-kommýnaldyq sharýashylyq jáne abattandyrý basqarmasynyń basshysy Dımash Qojabekov aıtty.

Onyń sózinshe, baǵdarlamanyń basty maqsaty — memlekettik qyzmetkerler men sportshylarǵa, sondaı-aq bıýdjettik sala mamandaryna qoljetimdi baspana berý. Baǵdarlama aıasynda 30 mln teńgege deıin ıpotekalyq nesıe beriledi jáne paıyzdyq mólsherlemesi 5% bolady. Al bastapqy jarna mólsheri — 10%.

Oǵan qatysý úshin Almaty oblysynda keminde sońǵy 24 aı resmı jumys ótili talap etiledi jáne ótinish bergen kezde adamnyń menshiginde úıi bolmaýy kerek.

— Baǵdarlamaǵa oblystyq bıýdjetten 3,146 mlrd teńge, al «Otbasy bank» tarapynan qosymsha 629 mıllıon teńge qarjy bólindi. Bul qarjy 120-dan astam azamatty baspanamen qamtamasyz etýge múmkindik beredi, — dedi ol.

Ótinim qabyldaý 2025 jyldyń 25 tamyzynda bastalady. Qabyldaý orny — Qonaev qalasy, Qonaev kóshesi, 7/1, «Otbasy bank» ǵımaraty.

Eske salaıyq, bıyl «Almaty jastary» baǵdarlamasy boıynsha 6626 ótinim tústi.