Almaty oblysynda ákimdikter jerdi zańsyz bergen

QONAEV. KAZINFORM – Almaty oblysynda jer qatynastary salasyndaǵy iri zańbuzýshylyqtar anyqtaldy. Prokýratýra jergilikti atqarýshy organdardyń jalǵan sheshimderine baılanysty birqatar zańsyz áreketterdi anyqtady. 

Almaty oblysy prokýratýrasy júrgizgen taldaý nátıjesinde keı ákimdikterdiń resmı qujattardy qoldan jasaý arqyly jerdiń nysanaly maqsatyn ózgertkeni belgili boldy.

Atap aıtqanda, Qarasaı aýdanynda jalpy aýmaǵy 5 gektar aýyl sharýashylyǵy jeriniń nysanaly maqsaty ákimdiktiń jalǵan sheshimderiniń negizinde zańsyz ózgertilgen. Keıin bul aýmaq 83 jeke jer ýchaskesine bólinip ketken.

– Prokýratýranyń talabymen Qarasaı aýdandyq sotynyń sheshimimen jergilikti atqarýshy organdardyń jalǵan sheshimderi zańsyz dep tanylyp, kúshi joıyldy, - delingen habarlamada.

Osyǵan uqsas zańbuzýshylyq Іle aýdanynda da tirkeldi. Munda jeke turǵyn úı qurylysyna jer berý týraly ákimniń sheshimi jalǵan bolyp shyqqan. Prokýrorlyq qadaǵalaý aktisinen keıin sot sheshimimen atalǵan jer ýchaskesi memleket menshigine qaıtaryldy.

Atalǵan faktiler boıynsha prokýratýranyń úılestirýimen polıtsııa QR QK-niń 385-baby 3-bóligi (jalǵan qujattardy jasaý jáne ótkizý) boıynsha qylmystyq is tirkedi.

– Qazir tergeý organdary istiń barlyq mán-jaıyn jan-jaqty jáne obektıvti anyqtaýǵa baǵyttalǵan tergeý áreketterin júrgizip jatyr. QR QPK-niń 201-baby 1-bóligine sáıkes sotqa deıingi tergep-tekserý derekteri jarııa etilmeıdi, - dep habarlady Almaty oblysynyń prokýratýrasy.

Eske salaıyq, buǵan deıin Almaty oblysynda jerdi zańsyz bólgen aýdan ákimdiginiń qyzmetkerlerine qylmystyq is qozǵalǵanyn habarlaǵanbyz.