Almaty oblysynda ákesi qyzyn pyshaqtap óltirdi degen kúdikke ilindi

QONAEV. KAZINFORM – Almaty oblysynda 15 jastaǵy qyzdyń ólimine baılanysty qylmystyq is qozǵaldy.

Áleýmettik jelide Talǵar aýdanynyń Tuzdybastaý aýylynda er adam óziniń 15 jastaǵy qyzyn pyshaqtap óltirgeni týraly aqparat tarady.

Almaty oblysynyń polıtsııa departamenti kisi óltirdi degen kúdikpen Tuzdybastaý aýylynyń turǵyny ustalǵanyn rastady.

— Otbasy týystarynyń biri polıtsııaǵa 15 jastaǵy stýdenttiń máıiti tabylǵany týraly habarlady. Oqıǵa ornyna kelgen polıtseıler alkogoldik masań kúıde bolǵan kúdiktini ustady. Sondaı-aq úıden qylmys quraly tárkilendi, — dep habarlady departamentten.

Qazir tártip saqshylary bul derek boıynsha kisi óltirý baby boıynsha qylmystyq is qozǵap, oqıǵanyń barlyq mán-jaıyn anyqtaýǵa baǵyttalǵan tergeý áreketteri júrgizip jatyr. Іs Almaty oblysy polıtsııa departamenti basshylyǵynyń erekshe baqylaýyna alyndy.

Eske salaıyq, bıyl 6 qyrkúıekte Talǵarda jantúrshigerlik qylmys boldy. Beıtanys adam er kisini atyp, kishkentaı qyzdy alyp qashyp ketti.

Tergeý málimetinshe, kúdikti men kishkentaı qyzdyń anasy buryn jaqyn qarym-qatynasta bolǵan. Aralarynda janjal shyǵyp, er adam áıeldiń aǵasyn myltyqpen atyp tastaǵan. Ol alǵan jaraqatynan sol jerde kóz jumǵan.

Keıin polıtsııanyń arnaıy jasaǵy qyzdy bosatyp, kúdiktini ustady. Artynsha jaraqat alǵan kishkentaı qyzǵa ota jasaldy.

Ótken aptada Talǵardaǵy qandy oqıǵa boıynsha is sotqa joldandy.