Almaty oblysynda AITV ınfektsııasyn juqtyrǵandardyń orta jasy — 30-49 jas

QONAEV.KAZINFORM — Almaty oblysynda jyl basynan beri AITV ınfektsııasyn 247 adam juqtyrǵan. Bul týraly «Almaty oblystyq JITS-tiń aldyn alý jáne oǵan qarsy kúres ortalyǵynyń» mamandary Óńirlik kommýnıkatsııalar qyzmetiniń alańynda habarlady.

AITV-ınfektsııasy — adamnyń ımmýn tapshylyǵy vırýsyn juqtyrý nátıjesinde paıda bolatyn, baıaý údemeli damıtyn juqpaly aýrý. Almaty oblystyq JITS-tiń aldyn alý jáne oǵan qarsy kúres ortalyǵynyń málimetine sáıkes, jyl basynan beri oblysta AITV ınfektsııasynyń 247 jańa jaǵdaıy tirkelgen. Juqtyrýdyń negizgi joly — jynystyq qatynas, al eń kóp taralýy 30-49 jas aralyǵyndaǵy azamattar arasynda baıqalady. Qazirgi tańda oblysta 2 536 adam dıspanserlik esepte tur. Onyń ishinde 2 435 adam antıretrovırýstyq terapııa qabyldap jatyr, emdeýdiń tıimdiligi — 91%.

Mamandardyń aıtýynsha, antıretrovırýstyq terapııanyń (ART) negizgi maqsaty — vırýstyń qan quramynda azaıýyn qamtamasyz etip, ımmýndyq júıeni qalpyna keltirý.

«ART-ty qabyldaıtyn naýqastardyń vırýs júktemesi anyqtalmaıdy. Sonyń arqasynda sońǵy eki jylda anadan balaǵa AITV juǵý jaǵdaılary tirkelmedi», — dedi ortalyqtyń emdeý-aldyn alý bóliminiń meńgerýshisi Svetlana Melman.

Sonymen qatar, Almaty men Qonaev qalalarynda ashylǵan Dostyq kabınetterinde jynystyq jolmen beriletin ınfektsııalardy dıagnostıkalaý jáne emdeý júrgiziledi. Jyl basynan beri bul kabınetterge shamamen 1 000 adam júgingen.

Eske salaıyq, buǵan deıin elimizde 5 myńǵa jýyq jetkinshek APV-ǵa qarsy vaktsına alǵanyn jazǵanbyz.