Almaty oblysynda 967 qaraýsyz qalǵan nysan memleket menshigine qaıtaryldy
QONAEV. KAZINFORM – Sońǵy eki jylda sot sheshimimen buryn senimgerlik basqarýǵa berilgen strategııalyq mańyzy bar nysandar Almaty oblysynyń kommýnaldyq menshigine qaıtaryldy.
Oblys ákimdigi memleket menshigine qaıtarylǵan mańyzdy nysandardy atady:
– Úshqońyr sý sharýashylyǵy kolledji. 2016 jyly senimgerlik basqarýǵa berilgen, alaıda ınvestor 66,6 mln teńge ınvestıtsııa qarastyrylǵan kelisim sharttaryn oryndamaǵan. Sot óndirisiniń nátıjesinde múlik qaıtadan memleket menshigine ótti.
– 2019 jyly Esik kólindegi bóget satyp alý quqyǵynsyz 49 jylǵa senimgerlik basqarýǵa berilgen. Ýchaskeniń aýmaǵy - 141,643 gektar. 2018 jylǵy tender sharty boıynsha ınvestor 1,1 mlrd teńge salýy kerek edi, biraq mindetteme oryndalmady. 2024 jyly sot múlikti memleket menshigine qaıtardy.
– Esik kóliniń bógetin keshendi qalpyna keltirý jumystaryn júrgizý úshin osy jyly 23 mlrd teńgeden astam ınvestıtsııa tartyldy. Bul aýyl sharýashylyǵyn, jergilikti turǵyndardy turaqty sýmen qamtamasyz etip, týrızm ınfraqurylymynyń damýyn jaqsartady, bul óńir ekonomıkasyna oń áserin tıgizedi, – dep atap ótti ákimdikten.
– Qaskeleń qalasyndaǵy óner mektebiniń eki ǵımaratyn jeke ınvestor 134 mln teńgege satyp alǵan, biraq onymen jasalǵan kelisim-shart jaramsyz dep tanyldy. Qarjy basqarmasy sheshimge shaǵymdanǵannan keıin bul nysandar kommýnaldyq menshikke qaıtaryldy.
– Almaty ekonomıkalyq kolledji de memleket menshigine qaıta ótti.
Kommýnaldyq menshikti túgendeý barysynda 967 bos jáne tozyǵy jetken ǵımarat anyqtaldy. Onyń ishinde 188-i qaraýsyz qalǵan, 341-i bos turǵan kommýnaldyq ǵımarattar, sondaı-aq bilim, densaýlyq saqtaý jáne respýblıkalyq múlik basqarmalarynyń qaramaǵyndaǵy nysandar bar.
– Bul ǵımarattardyń keıbiri buzylady, basqalary aýktsıonǵa qoıylady, al keıbireýleri qalpyna keltiriletin bolady, – dep túsindirdi qarjy basqarmasy.
Oblystyq qarjy basqarmasynyń basshysy Bıbigúl Uzaqova atap ótkendeı, bul baǵyttaǵy jumystar jalǵasatyn bolady.
– Biz bul ǵımarattardyń zamanaýı oqý oryndaryna, sport keshenderi men mádenıet oshaqtaryna aınalý múmkindigin kórip otyrmyz. Memlekettik menshik qoǵam ıgiligi úshin jumys isteýi kerek, – dedi ol.
Qazirdiń ózinde ınvestıtsııalyq jobalardy júzege asyrý úshin 69 nysan iriktelip alyndy, onyń beseýi boıynsha áleýetti seriktesterdi izdeý konkýrstary bastaldy. Bılik memlekettik múlikti tıimdi basqarý jańa ınvestıtsııa tartyp, jergilikti bıýdjetke qosymsha kiris kózin ashatynyna senimdi.
Byltyr óńirde jalpy alańy 397 313 gektar bolatyn, 1340 jer ýchaskesiniń paıdalanylmaı jatqany anyqtalǵan bolatyn.