Almaty oblysynda 89 mlrd teńgege úı janýarlaryna jemshóp óndiretin zaýyt salynady

ASTANA. KAZINFORM — Prezıdent Almaty oblysynda óńdeý ónerkásibin damytý jónindegi tapsyrmalaryn júzege asyrý sheńberinde úı janýarlaryna arnalǵan daıyn jem óndiretin zaýyt salý jobasy iske asyrylady. Premer-mınıstr Oljas Bektenov tıisti qaýlyǵa qol qoıdy.

Atap aıtqanda, Aýyl sharýashylyǵy mınıstrligi «Mars Petcare Kazakhstan» JShS-men Qonaev qalasynda zaýyt salý týraly kelisim jasady. Investıtsııanyń jalpy kólemi 88,8 mlrd teńgeden asatyn kásiporynnyń jobalyq qýaty – jylyna 100 myń tonna ónim.

- 2030 jyldyń 31 jeltoqsanyna deıin nysandy salý jáne paıdalanýǵa berý josparlanǵan. Jumys 2031 jyldyń 1 qańtarynan bastalady. Zaýytta 200 jumys orny ashylady, onyń keminde 85%-y qazaqstandyqtar úlesine tıesili. Sonymen qatar kompanııa kadrlardy oqytý jáne olardyń biliktiligin arttyrý boıynsha is-sharalar ótkizýdi josparlap otyr, - delingen jazbada.

Jobany júzege asyrý elimizdiń óńdeý ónerkásibin damytýǵa eleýli úles qosyp, qosylǵan quny joǵary ónimder jelisin keńeıtýge, ımportqa táýeldilikti azaıtýǵa jáne óńirde turaqty óndiristik bazany qalyptastyrýǵa múmkindik beredi.

Aıta keteıik, Almaty oblysyna Danııadan 1 myńǵa jýyq Golshtın-Frız sıyrlary jetkizildi.