Almaty oblysynda 800-den astam quqyqbuzýshylyq anyqtaldy
ASTANA.KAZINFORM - Almaty oblysy prokýratýrasynyń bastamasymen «Aıqyn nátıje» jobasyn iske asyrý maqsatynda meıram jáne demalys kúnderi aýqymdy reıdtik is-sharalar ótkizildi, dep habarlaıdy Almaty oblysy prokýratýrasynyń baspasóz qyzmeti.
Negizgi nazar qoǵamdyq oryndarǵa, oıyn-saýyq mekemelerine, jasóspirimder qylmysynyń aldyn alýǵa, alkogol ónimderin zańsyz satýǵa, sondaı-aq keshki jáne túngi ýaqytta qoǵamdyq tártipti qamtamasyz etýge aýdaryldy.
Reıdterdiń nátıjesinde 800-den astam ákimshilik quqyqbuzýshylyq anyqtaldy. Atap aıtqanda:
- 10alkogol ónimderin tyıym salynǵan ýaqytta satýdyń faktisi;
- 83 qoǵamdyq oryndarda alkogoldik ishimdik ishý jáne mas kúıinde júrýdiń faktisi;
- 66kámeletke tolmaǵandardyń túngi ýaqytta zańdy ókilderiniń erip júrýinsiz úıden tys jerde bolýynyń faktisi;
- 12kólik quralyn mas kúıinde basqarýdyń faktisi;
- 292qujatsyz nemese kólik quralyn basqarý quqyǵynsyz basqarýdyń faktisi.
Erekshe alańdaýshylyq týdyrǵan jaǵdaılardyń biri kompıýterlik klýbtardyń birinde túngi saǵat 12-den keıin 9 jastaǵy balanyń eresekterdiń qaraýynsyz bolýy.
Mundaı faktiler tek zańbuzýshylyq qana emes, sonymen qatar eresekter tarapynan baqylaýdyń jetkiliksizdigin kórsetedi jáne balalar men aınalasyndaǵylardyń qaýipsizdigine naqty qaýip tóndiredi.
Tájirıbe kórsetkendeı, kámeletke tolmaǵandardyń túngi ýaqytta qaraýsyz júrýi, alkogoldi shamadan tys tutyný jáne quqyqbuzýshylyqtarǵa nemquraıly qaraý kóbine aýyr qylmystar men qaıǵyly jaǵdaılardyń alǵyshartyna aınalady.
Oblys prokýratýrasy ata-analardy balalarǵa kóbirek kóńil bólýge, olardyń aralasatyn ortasyn bilýge, qaıda júrgenin baqylaýda ustaýǵa jáne bolyp jatqan jaǵdaılarǵa beıjaı qaramaýǵa shaqyrady.
-Qoǵamdyq tártipti qamtamasyz etý jáne quqyqbuzýshylyqtardyń aldyn alý jumystary turaqty baqylaýda jáne aldaǵy ýaqytta da jalǵasatyn bolady,-delingen habarlamada.
Osyǵan deıin habarlaǵanymyzdaı, kámeletke tolmaǵandar arasynda quqyqbuzýshylyqtar sany 60 paıyzǵa azaıǵan.
