Almaty oblysynda 800-den astam kólikti zańsyz tirkeýge qoıǵan 17 adam sottaldy

Sot olardyń árqaısysyna qylmystaǵy róli men qatysý deńgeıine qaraı 2 jyldan 11 jylǵa deıin bas bostandyǵynan aıyrý jazasyn taǵaıyndady.

Memleketke tólenbegen tirkeý jáne ýtıl alymdarynyń jalpy somasy 6,6 mlrd teńgeden asty.

Tergeý barysynda QMA-nyń Almaty oblysy boıynsha departamenti qylmystyq toptyń eki jyl boıy belgilengen talaptardy aınalyp ótip, avtokólikterdi zańsyz tirkeýmen aınalysqanyn anyqtady.

Alǵashqy kezeńde shemaǵa qatysýshylar tehnıkalyq reglament talaptaryn buza otyryp Qazaqstanǵa ákelingen 642 júk kóligin zańsyz tirkegen.

Keıin qylmystyq áreket jeńil kólikterge qatysty «qosar kólikterdi tiriltý» dep atalatyn shema boıynsha jalǵasqan. Zańsyz ákelingen kólikterge Qazaqstanda buryn tirkelip, keıin esepten shyǵarylǵan kólikterdiń VIN-kodtary berilgen. Osy tásilmen taǵy 209 kólik tirkelgen. Zańsyz shemaǵa polıtsııa qyzmetkerleri, mamandandyrylǵan HQKO qyzmetkerleri jáne jeke notarıýstar qatysqan. Olar aqparattyq júıelerge jalǵan málimet engizýdi jáne jalǵan tulǵalarǵa senimhat rásimdeýdi qamtamasyz etken.

Tólenbegen tirkeý alymynyń somasy 5,4 mlrd teńge, ýtıl alymy 1,2 mlrd teńge boldy. Tergeý barysynda kólik ıeleri alǵashqy tirkeý alymdaryn óz erkimen tólep, nátıjesinde memleketke 1 mlrd teńgeden astam qarajat qaıtaryldy.

Sonymen qatar sot úkimimen sottalǵandardyń qylmystyq tabysqa satyp alǵan bes avtokóligi memleket kirisine tárkilendi.

Burynǵy tórt polıtsııa qyzmetkeri arnaıy ataqtarynan aıyryldy. Qatysy bar notarıýstarǵa sot notarıattyq qyzmetpen aınalysýǵa tyıym saldy.

QMA málimetinshe, sot úkimi zańdy kúshine engen joq.

Aıta keteıik, Pavlodarda mas kúıde kólik júrgizgen 18 adam ustaldy.