Almaty oblysynda 8 sý qoımasy memleketke qaıtaryldy

QONAEV. KAZINFORM – Almaty oblysynyń tabıǵat qorǵaý prokýratýrasy sý resýrstaryn basqarý salasynda memlekettiń múddelerin qorǵaý boıynsha aýqymdy jumys júrgizdi. 

Vedomstvodan málim etkendeı, qadaǵalaý qyzmeti barysynda senimgerlikpen basqarýshylar tarapynan buzýshylyqtar anyqtaldy. 

Olar segiz sý qoımasynyń tıisti tehnıkalyq jaı-kúıin saqtaý jónindegi sharttyq mindettemelerdi oryndamaǵan. Atap aıtqanda, sý sharýashylyǵy júıeleri men qurylystaryna tekserý júrgizbegen. Bul jaǵdaılar halyqtyń ómiri men densaýlyǵyna, qorshaǵan ortaǵa keri áser etýi múmkin. 

– Qabyldanǵan sharalardyń arqasynda jaýapsyz basqarýshylarmen 8 shart buzyldy. Al quny 20 mlrd teńgeden asatyn múlik memleket menshigine qaıtaryldy. Qazir prokýrorlyq qadaǵalaý aktisi boıynsha ýákiletti organdar sý obektilerin kóp faktorly tehnıkalyq tekserý boıynsha jumys júrgizip jatyr, - delingen habarlamada.

Osyǵan deıin Almaty oblysynda 967 qaraýsyz qalǵan nysan memleket menshigine qaıtarylǵany týraly jazǵan edik.