Almaty oblysynda 70-ten astam mektepte myńnan astam bala ystyq tamaqpen qamtamasyz etilmegen
ALMATY. KAZINFORM - Almaty oblysynyń prokýratýrasy bilim berý salasynda balalardyń quqyqtarynyń buzylýyn anyqtady.
Qoldanystaǵy zańnamaǵa sáıkes, memlekettik bilim berý uıymdarynda ataýly áleýmettik kómek alatyn otbasylardyń balalary tegin ystyq tamaqpen qamtamasyz etilýge tıis.
Alaıda júrgizilgen tekserý nátıjesinde oblystyń 70-ten astam mektebinde (Eńbekshiqazaq aýdany – 45, Talǵar – 7, Jambyl – 5, Uıǵyr – 14, Qarasaı – 4, Qonaev qalasy – 9) atalǵan talaptardyń saqtalmaǵany anyqtaldy.
Nátıjesinde 1 101 bala memlekettik qoldaýdyń bul túrimen qamtylmaǵan.
- Prokýrorlyq qadaǵalaý aktileri boıynsha balalardyń quqyqtary qalpyna keltirilip, barlyq oqýshylar tıisti tamaqpen qamtamasyz etildi, kináli laýazymdy tulǵalar jaýapqa tartyldy. Jalpy bıyl oblys prokýratýrasy 30 myńǵa jýyq balanyń quqyqtary men zańdy múddelerin qorǵady,-delingen habarlamada.
Osyǵan deıin Atyraý oblysynda prokýratýra aralasqannan keıin pedagogterge 7,2 mln teńge tólengeni týraly jazdyq.
