Almaty oblysynda 7-synyp oqýshysyn zorlaý áreketi boıynsha tergeý júrip jatyr

QONAEV. KAZINFORM – Almaty oblysy Jambyl aýdanyna qarasty Qarǵaly aýylynda kámeletke tolmaǵan qyzdy birneshe adam zorlady degen habar tarady. Bul is boıynsha tergeý bastaldy.

Jelide taraǵan vıdeoda áıel men birneshe ata-ana mektepke kelip, 7-synypta oqıtyn jetim qyzdyń zorlyq kórgenin jáne muny basshylyqtyń jasyrýǵa tyrysqanyn aıtady.

Jambyl aýdandyq bilim bóliminiń málimetinshe, oqıǵa 2025 jylǵy 21 qyrkúıekte, jeksenbi kúni mektep aýmaǵynan tys, úıde bolǵan. Mektep dırektory bul jaǵdaı týraly 13 qazanda bilip, dereý quqyq qorǵaý organdaryna habar bergen.

– Atalǵan derek boıynsha tergeý organdary Qazaqstan Respýblıkasynyń Qylmystyq kodeksiniń 124-baby 1-bóligi («On alty jasqa tolmaǵan adamǵa qatysty zorlyq-zombylyqsyz jynystyq sıpattaǵy áreketter jasaý») boıynsha qylmystyq is qozǵady. Qazir oqıǵanyń barlyq mán-jaıyn anyqtaýǵa baǵyttalǵan qajetti is-sharalar júrgizilip jatyr, - dep naqtylady óńir ákimdiginiń baspasóz qyzmeti.

Oqýshylarmen jeke profılaktıkalyq jáne túsindirý jumystary júrgizilip jatyr. Oblystyq psıhologııalyq qoldaý ortalyǵynyń mamandary zardap shekken jasóspirimge kómek kórsetip jatyr.

– Mektep dırektory durys áreket etti, ol bul jaǵdaı týraly dereý polıtsııaǵa habarlaýǵa mindetti edi. Qazir tergeý organdary qylmystyq is qozǵap, barlyq jaıt naqtylanyp jatyr. Degenmen biz azamattardan jalǵan aqparat taratpaýdy jáne balalarǵa qatysty máseleni haıpqa aınaldyrmaýdy ótinemiz. Óıtkeni eń bastysy – balanyń taǵdyry men jaǵdaıy, - dedi Jambyl aýdanynyń bilim bóliminiń basshysy Svetlana Altynbekova.

Eske salaıyq, buǵan deıin Pavlodarda kámelet jasyna tolmaǵan qyz ben baýyryn zorlaǵan qos er adam sottalǵanyn jazǵanbyz.