Almaty oblysynda 7 agroınvestıtsııalyq joba iske asady
ASTANA. KAZINFORM - Bıyl Almaty oblysynda agroónerkásiptik keshen salasynda 7 ınvestıtsııalyq jobany iske asyrý josparlanyp otyr. Jobalardyń jalpy quny – 44,6 mlrd teńge.
QR Aýyl sharýashylyǵy mınıstrligi baspasóz qyzmetiniń habarlaýynsha, jobalar aýyl sharýashylyǵy óndirisin keńeıtýge, óńirdiń azyq-túlik qaýipsizdigin arttyrýǵa jáne jańa jumys oryndaryn qurýǵa baǵyttalǵan.
Atalǵan jobalardy iske asyrý agroónerkásiptik salaǵa ınvestıtsııalar tartýǵa, qaıta óńdeý ónerkásibin damytýǵa jáne aýyl sharýashylyǵy ónimderiniń básekege qabilettiligin arttyrýǵa múmkindik beredi.
Aýyl sharýashylyǵy taýaryn óndirýshilerdi qoldaý maqsatynda birqatar memlekettik baǵdarlamalar júzege asyrylyp jatyr. Solardyń biri – Soltústik Qazaqstan oblysynyń tájirıbesi negizinde agroónerkásiptik keshendegi ınvestıtsııalyq jobalardy nesıeleý baǵdarlamasy.
Baǵdarlama aıasynda 4 mlrd teńge qarastyrylyp, eki joba qarjylandyryldy. Atap aıtqanda, 1,5 mlrd teńge «Alfalfa» JShS-niń sý únemdeý tehnologııalaryn engizý jobasyna, al 2,5 mlrd teńge «Azııa Agro Fýd» AQ-nyń júgerini qaıta óńdeý zaýytyn keńeıtýine baǵyttaldy.
Sonymen qatar, 2026 jyly osy baǵdarlama aıasynda jalpy quny 5 mlrd teńgeni quraıtyn taǵy 4 jobany iske asyrý josparda tur.
Almaty oblysy aýyl sharýashylyǵy basqarmasynyń basshysy Dımash Sydyqovtyń aıtýynsha, agroónerkásiptik sektorǵa ınvestıtsııa tartý óńir aýyl sharýashylyǵyn jańǵyrtýdyń negizgi baǵyttarynyń biri.
- Bıyl iske asyrylatyn jobalar agroónerkásiptik keshenniń óndiristik áleýetin arttyryp, zamanaýı tehnologııalardy engizýge múmkindik beredi. Bul óz kezeginde óndiris kólemin ulǵaıtyp qana qoımaı, aýyl sharýashylyǵy ónimderin tereń óńdeýdi damytýǵa jáne jańa jumys oryndaryn ashýǵa serpin beredi, – dedi Dımash Sydyqov.
Sondaı-aq, Aýyl sharýashylyǵy mınıstrligi men «Báıterek» ulttyq basqarýshy holdıngi qalyptastyrǵan «Investıtsııalyq tapsyrys» bastamasy aıasynda jalpy somasy 708,7 mlrd teńgeni quraıtyn 26 jobany qarjylandyrý múmkindigi qarastyrylyp jatyr.
Aıta keteıik, 2025 jyly Almaty oblysynyń agroónerkásip keshenine salynǵan ınvestıtsııalar kólemi (alkogol ónimderin óndirýdi esepke almaǵanda) 178,2 mlrd teńgeni qurap, jospar 145,4%-ǵa oryndaldy. Bastapqyda 122,6 mlrd teńge tartý josparlanǵan bolatyn.
Budan bólek, bekitilgen Jol kartasy aıasynda ótken jyly jalpy quny 29 mlrd teńgeni quraıtyn 14 joba iske asyryldy. Onyń ishinde 9 sút-taýar fermasy, 1 jylyjaı kesheni, 1 balyq sharýashylyǵy, 1 kókónis saqtaý qoımasy, 1 vaflı ónimderin óndirý zaýyty jáne 1 qus fabrıkasy bar.
Osyǵan deıin asyl tuqymdy sıyr alýǵa 6 paıyzdyq nesıe berý bastalǵany týraly jazdyq.
