Almaty oblysynda 600 mln teńgege alaıaqtyq jasaǵan dropperler toby ustaldy
ALMATY. KAZINFORM — Almaty oblysy polıtsııa departamentiniń kıberqylmysqa qarsy kúres basqarmasynyń qyzmetkerleri QR ІІM kıberqylmysqa qarsy kúres departamentiniń úılestirýimen Telegram messendjeri arqyly alaıaqtyqpen aınalysqan qylmystyq toptyń uıymdastyrýshysy men onyń tórt sybaılasyn qolǵa túsirdi.
— Tergeý barysynda anyqtalǵandaı, ustalǵan kúdikti — qylmystyq shemanyń kýratory 2024 jyldyń maýsym aıynan bastap 50-den astam «droptardy» basqarǵan. Olar — óz atyna nemese úshinshi tulǵalardyń atyna banktik kartalar rásimdegen. Qylmystyq toptyń shottary arqyly myńnan astam qarjylyq operatsııa júrgizilip, jalpy aınalym somasy 580 mıllıon teńgeden asqan. Árbir tranzaktsııadan kýrator 6 paıyz kóleminde komıssııa alyp otyrǵan, onyń zańsyz tabysy 35 mıllıon teńgeden asqany belgili boldy, — delingen habarlamada.
Polisia.kz-tiń málimetinshe, «Antıfrod ortalyǵy» bazasy arqyly júrgizilgen tekserý barysynda droptarǵa qatysty qylmystyq ister elimizdiń birneshe óńirinde — Almaty oblysynyń Qarasaı jáne Eńbekshiqazaq aýdandarynda, Almaty, Shymkent, Qyzylorda qalalarynda jáne Mańǵystaý oblysynda tergelip jatyr.
Belgili bolǵandaı, qylmystyq toptyń basshysy Telegram arqyly «ońaı aqsha tabý» týraly jalǵan habarlandyrýlar taratyp, droptar qataryn tolyqtyrǵan. Kýrator adamdardy banktik kartalardy óz atyna nemese bóten tulǵalardyń atyna rásimdeýge kóndirgen. Qylmyskerler bul kartalardy jábirlenýshilerden túrli syltaýmen, ıaǵnı ınvestıtsııa salý nemese taýarlar men qyzmetter úshin aqy tóleý túrindegi jalǵan áreketter arqyly aqsha aýdaryp, izin jasyrý úshin paıdalanǵan.
Urlanǵan qarajat qolma-qol sheshilip, krıptovalıýtaǵa aıyrbastalǵan nemese basqa esepshottarǵa taratylyp otyrǵan. Qylmystyq shemanyń uıymdastyrýshylary negizgi paıdany ózara bólisse, droptarǵa az ǵana syıaqy berilgen. Al olardyń banktik kartalary aýyr quqyq buzýshylyqtarda paıdalanylǵandyqtan, qylmystyq jaýapkershilikke tartylyp otyr. Al alaıaqtyqtyń negizgi uıymdastyrýshylary men kýrator kóleńkede áreket etken.
Qazirgi ýaqytta kúdiktiler ustalyp, tergeý ızolıatoryna qamaldy. Tergeý barysynda olardyń ózge de uqsas qylmystarǵa qatystylyǵy tekserilýde. Sonymen qatar polıtsııa ekinshi deńgeıli bankterge sanktsııalanǵan suraýlar joldap, basqa da kúdikti operatsııalardy anyqtaýdy josparlap otyr.
Quqyq qorǵaý organdary azamattarǵa alaıaqtardan saq bolýǵa keńes beredi jáne bank shottary men jeke derekterdi bógde adamdarǵa bermeýge shaqyrady. Eger kúmándi qarjylyq áreketter baıqalsa, dereý polıtsııaǵa habarlasý qajet ekenin eskertedi.
Aıta ketelik «Dropperlerden» zańsyz jolmen ıelengen qarajat óndirilgen edi.